Yoshua 16 - Baibuli Ekibono kya Katonda 2014

Ekiketezo eky'Abaefuraimu n'eky'Abamanasse

¹ Ensalosalo ey'oku luuyi olw'omukono omusaadha olw'e buvandhuba ey'ekiketezo ekyagheebwa baidhukulu ba Yosefu, ng'etoolerera ku Yorudani, okumpi ni Yeriko, yaaja nga yeeyongerayo mu irungu. Bw'eva e Yeriko eniinaaniina ekiketezo eky'oku nsozi yaatuuka e Betheli.

² Yaava e Betheli yaaja e Luzi, era yeeyongerayo okutuuka e Atarothi Addari, ekiketezo eky'Abaraki.

³ Agho yaaja ng'eyolekera e bugwandhuba, ng'ebita mu kiketezo eky'Abayafuleti, yaabita ghansi gh'olusozi Bethi Horoni. Era yaava agho yaabita e Gezeri yaatuuka ku Nhandha Eyaghagati.

⁴ Ekyo n'ekiketezo ekyagheebwa ebika ebibiri ebyava mu Yosefu eky'Abaefuraimu n'eky'Abamanasse e Bugwandhuba.

Abaefuraimu

⁵ Ekiketezo eky'Abaefuraimu kyalinga n'ensalosalo ng'eva mu Atarothi Addari e buvandhuba, yaatuuka e Bethi Horoni eky'eitale,

⁶ era yeeyongerayo okutuuka ku Nhandha Eyaghagati. Ku luuyi olw'omukono omugooda olw'e buvandhuba, nga bagabana ensalosalo ni Mikamethathi e buvandhuba ng'ensalosalo eyo ekyuka yaaja ng'eyolekera Taanathi Shilo, era yaakibita ku luuyi lwakyo olw'e buvandhuba yaatuuka e Yanoa.

⁷ Okuva agho, ng'eserengeta yaatuuka e Atarothi n'e Naara, yaagemaku ku Yeriko katono, era yaakoma ku Yorudani.

⁸ Okuva e Tappua ensalosalo eno ng'eja e bugwandhuba yaatuuka ku kaiga ke baayetanga Kana, era yaaja yaakoma ku Nhandha Eyaghagati. Ogwo n'omugabo ogwagheebwa ekika eky'Abaefuraimu nga bajiira ku nda dhaibwe.

⁹ Okwo nga ni kw'oyongereza ebibuga ebindi n'ebyalo byaku ebyali mu kiketezo eky'Abamanasse, aye nga byagheebwa Baefuraimu.

¹⁰ Aye tibaabingamu Bakanaani be baayagaana nga n'ababa mu Gezeri. Era ni ye buli eno Abakanaani baba ghalala n'Abaefuraimu aye nga baafuulibwa bairu abakola emirimo egy'olukako.