Yoshua 15 - Baibuli Ekibono kya Katonda 2014

Ekiketezo ekyagheebwa Yuda

¹ Ekiketezo eky'ab'ekika kya Yuda kye baafuna nga kija kyatuuka ku irungu lya Zini ghe likoma, ku luuyi olw'omukono omusaadha olw'e buvandhuba, aghali ensalosalo ni Edomu.

² Ensalosalo eno ey'oku luuyi olw'omukono omusaadha olw'e buvandhuba, ng'eva ku kikono eky'Enhandha Eyomuunhu,

³ yaaja nga yeeyongerayo ku mukono gwene ogwo, yaaniinaniina Akirabbimu, era yeeyongerayo okutuuka ku Zini. Era yeeyongerayo ku luuyi lwene olwo olw'ekibuga Kadeshi Barinea, yaabita ku Hezironi yaatuuka ku Addari, yaakyuka yaayolekera Karika.

⁴ Nga bw'etuuka Azimoni enonereza omwiga oguli ku nsalosalo ni Misiri, yaatuuka ku Nhandha Eyaghagati yaakoma agho. Eyo n'eyali ensalosalo ya Yuda ku luuyi olw'omukono omusaadha olw'e buvandhuba.

⁵ Ensalosalo yaakyo ey'e buvandhuba yali Enhandha Eyomuunhu okuva agho omwiga Yorudani ghe gufukira mu nhandha aghali ekikono kyayo. Era agho nga n'aghatoolerera ensalosalo ey'oku luuyi olw'omukono omugooda olw'e buvandhuba,

⁶ yaaja, yaatuuka ku Bethi Hogula, era yaaja ng'ebita ku luuyi lwene olwo era olwa Bethi Araba, yaatuuka ku ibaale lya Bohani mutabane wa Reubeni.

⁷ Ensalosalo eyo ng'ebita mu kyetebwa Ekiiko eky'Ebizibu yaatuuka e Debiri, yeeyongerayo ku luuyi lwene olwo, yaakyuka okwolekera Giligali ekiringiriire olusozi Adummimu, ku luuyi olw'omukono omusaadha olw'e buvandhuba olw'ekiiko ekyo. Agho yaaja ng'ebita ku miiga egy'e Enishemeshi okutuuka ku kibuga Enirogeli.

⁸ Nga bw'etuuka agho enonereza ekiiko ekya mutabane wa Hinnomu ku luuyi olw'omukono omusaadha olw'e buvandhuba mu mbali mw'olusozi Yebusi ng'ekyo ni Yerusalemu. Agho nga eja yaaniina ku lusozi oluli e bugwandhuba w'Ekiiko kya Hinnomu, ku luuyi olw'omukono omugooda olw'e buvandhuba w'Ekiiko ky'Abarefa.

⁹ Kabiri yaava ghaigulu ku lusozi olwo yaaserengeta okutuuka ku miiga egy'e Mefutoa, era yaabitagho okutuuka ku bibuga ebiri ku lusozi Efuroni. Agho yaakyuka yaayolekera e Baala ng'ekyo ni Kiriathi Yearimu.

¹⁰ Nga bw'etuuka e Baala eja ng'ekyezungulula, yaakibita e bugwandhuba yaatuuka ku lusozi Seiri, yeeyongerayo yatuuka ku lusozi Yearimu, ng'ekyo ni Kesaloni, yaalubita ku luuyi lwalwo olw'omukono omugooda olw'e buvandhuba. Agho yaaja yatuuka e Bethi Shemeshi, era yaabita ku Timuna,

¹¹ yaaja ku lusozi Ekuroni ng'erubita ku luuyi lwene olwo, kabiri yaakyuka okutuuka e Shikkeroni, yaaja yaabisa olusozi Baala, yaabita ku Yabuneeli, yaakoma ku Nhandha Eyaghagati.

¹² E bugwandhuba, ensalosalo yaibwe yali Enhandha Eyaghagati. Eyo n'ensalosalo eyeezungulula ekiketezo eky'Abayuda ng'enda dhaibwe bwe dhaali.

Kalebu aghangula Heburoni ni Debiri

¹³ Nga Musengwa Katonda bwe yalagira, Yoshua yagha Kalebu mutabane wa Yefunne era ow'omu kika kya Yuda, ekitundu ku kiketezo kye yagha Abayuda. Yamugha ekibuga Heburoni, ekyo nga ni Kiriathi Araba, Araba nga n'azaala Anaki.

¹⁴ Kalebu yaabingamu baidhukulu ba Anaki abaava mu baana be bano: Sheshai, Ahimani ni Talumai.

¹⁵ Bwe yava agho yaja yaalumba ekibuga Debiri ekyayetebwangaku Kiriathi Seferi.

¹⁶ Kalebu yaakoba abasaadha be ati: “Omuntu yeenayeena anaakuba n'aghangula Kiriathi Seferi, ndidha kumugha mughala wange Akisa abe mukazi we.”

¹⁷ Agho Othinieli mutabane wa Kenazi, nga Kenazi ono muganda wa Kalebu, yaakikuba yaakighangula, era Kalebu yaamugha mughala we Akisa.

¹⁸ Olunaku lwe yaidha okumufumbirwa, Othinieli yaakoba Akisa asabe ise ekibandha. Akisa yaaja yaatuuka, yaava ku ndogoyi ye. Kalebu yaamubuuza ati: “Oyenda nkughe ki.”

¹⁹ Akisa yaamwiramu ati: “Ensi y'ongabyemu ku luuyi olw'omukono omusaadha olw'e buvandhuba, nkalukalu, kale nkusaba ompe ekirabo, ompeeku aghali ensulo edh'amaadhi.” Kale Kalebu yaamugha ensulo ey'eitale n'ey'eifo.

Ebibuga bya Yuda

²⁰ Guno n'omugabo ogwagheebwa ekika kya Yuda nga bajiira ku nda dhaibwe.

²¹ Ku luuyi olw'omukono omusaadha olw'e buvandhuba aghasemberayo irala era ng'oyolekeire ensalosalo ni Edomu, baagheebwayo ebibuga bino: Kabuzeelo, Ederi, Yagura,

²² Kina, Dimona, Adada,

²³ Kedeshi, Hazori, Ithinani,

²⁴ Zifu, Telemu, Bealothi,

²⁵ Hazori Hadatta, Keriothi Hezironi, ekyo nga ni Hazori.

²⁶ Amamu, Shema, Molada,

²⁷ Hazari Gadda, Heshimoni, Bethipeleti,

²⁸ Hazari Shuali, Beerisheba, Biziothia,

²⁹ Baala, Iyimu, Ezemu,

³⁰ Elitoladi, Kyesili, Horuma,

³¹ Zikulaga, Madimanna, Sansanna,

³² Lebaothi, Shilihimu, Aini ni Rimmoni byonabyona nga n'ebibuga abiri n'omwenda n'ebyalo byaku.

³³ Mu kiketezo eky'omu kiiko, baagheebwayo ebibuga bino: Eshitaolo, Zora, Ashina,

³⁴ Zanoa, Engannimu, Tappua, Enamu,

³⁵ Yaramuthi, Adullamu, Soko, Azeka,

³⁶ Shaaraimu, Adithaimu, Gedera, ni Gederothaimu byonabyona nga n'ebibuga eikumi n'ebina (14) n'ebyalo byaku.

³⁷ Baagheebwayo n'ebibuga ebindi bino: Zenani, Hadasha, Migidaligadi,

³⁸ Dileani, Mizipa, Yokitheeli,

³⁹ Lakishi, Bozikathi, Eguloni,

⁴⁰ Kabboni, Lahamamu, Kitilishi,

⁴¹ Gederothi, Bethidagoni, Naama, ni Makkeda byonabyona nga n'ebibuga eikumi n'omukaaga n'ebyalo byaku.

⁴² Baagheebwayo n'ebibuga ebindi bino: Libuna, Etheri, Ashani,

⁴³ Ifuta, Ashina, Nezibu,

⁴⁴ Keila, Akazibu ni Maresha. Bino byali ebibuga mwenda n'ebyalo byaku.

⁴⁵ Era baagheebwayo ekibuga ekinene ekyetebwa Ekuroni, ghalala n'ebibuga ebindi ebitonotono ebikiriiraine, n'ebyalo byaku.

⁴⁶ N'ebibuga ebiriiraine Ashidodi, n'ebyalo byaku okuva e Ekuroni okutuuka ku Nhandha Eyaghagati.

⁴⁷ Era baagheebwayo ekiketezo ekindi nga kirimu ebibuga bino: Ashidodi ni Gaza, n'ebibuga ebitonotono ebibiriiraine, n'ebyalo byaku, okutuuka ku mwiga ogukola ensalosalo ni Misiri n'ebifo eby'oku Nhandha Eyaghagati.

⁴⁸ Mu kiketezo eky'oku nsozi baagheebwayo ebibuga bino: Shamiri, Yattiri, Soko,

⁴⁹ Danna, Kiriathi Sanna, ng'ekyo ni Debiri,

⁵⁰ Anabu, Eshitemoa, Animu,

⁵¹ Gosheni, Holoni, ni Gilo. Bino byali ebibuga ikumi na kirala n'ebyalo byaku.

⁵² Era baagheebwayo n'ekiketezo ekindi omwali ebibuga bino: Araba, Duma, Eshani,

⁵³ Yanimu, Bethi Tappua, Afeka,

⁵⁴ Humuta, Kiriathi Araba, ekyo nga ni Heburoni, ni Ziori. Bino byali ebibuga mwenda n'ebyalo byaku.

⁵⁵ Era baagheebwayo ekiketezo ekindi nga kirimu ebibuga bino: Maoni, Karumeli, Zifa, Yutta,

⁵⁶ Yezireeli, Yokodeamu, Zanoa,

⁵⁷ Kaini, Gibea, ni Timuna. Bino byali ebibuga ikumi n'ebyalo byaku.

⁵⁸ Era baagheebwayo n'ekiketezo ekindi ekyalimu ebibuga bino: Halahulu, Bethizuri, Gedori,

⁵⁹ Maarathi, Bethanothi, ni Elutekoni. Bino byali ebibuga mukaaga n'ebyalo byaku.

⁶⁰ Era baagheebwayo n'ekiketezo ekindi ekyalimu ebibuga bino: Kiriathi Baala, ekyo nga ni Kiriathi Yearimu, ni Rabba. Bino byali ebibuga bibiri n'ebyalo byaku.

⁶¹ Mu irungu baagheebwayo ebibuga bino: Bethi Araba, Middini, Sakaka,

⁶² Nibushani, ekyo nga n'Ekibuga Ekyomuunhu, n'ekiketezo ekyetebwa Engedi. Bino byali ebibuga mukaaga n'ebyalo byaku.

⁶³ Abayuda tibaaghanga kubinga Bayebusi be baayagaana nga n'ababa mu Yerusalemu. Era ni ye buli eno Abayebusi baba mu Yerusalemu ghalala n'Abayuda.