Yoshua 14 - Baibuli Ekibono kya Katonda 2014

Engabania ey'ekiketezo eky'e bugwandhuba wa Yorudani

¹ Kiti ekiketezo ky'e Kanaani eky'e bugwandhuba wa Yorudani bwe kyagabanizibwamu mu Baisiraeli, ng'okugabania kuno kukolebwa Eleazari kabona, ni Yoshua mutabane wa Nuni, n'abakulu ab'ebika eby'Abaisiraeli.

² Nga Musengwa Katonda bwe yalagira Musa, engabania ey'ekiketezo kino mu bika omwenda n'ekitundu, yali ya kukuba bululu.

³ Musa yali amaze okugha ebika ebibiri n'ekitundu omugabo gwaibwe e buvandhuba wa Yorudani, aye Abalevi tiyabagha.

⁴ Baidhukulu ba Yosefu baayawulwamu ebika bibiri: eky'Abamanasse n'eky'Abaefuraimu. Waire nga Abalevi Musa tiyabagha, baafuna ebibuga eby'okubangamu, n'ensiko ey'okwayirangamu ebisolo byaibwe.

⁵ Abaisiraeli baagabana eitaka nga Musengwa Katonda bwe yalagira Musa.

Yoshua agha Kalebu ekibuga Heburoni

⁶ Lulala, abantu ab'ekika ekya Yuda baidha ye Yoshua nga bakaali e Giligali. Owundi ku bantu abo ye baayetanga Kalebu mutabane wa Yefunne ow'oku nda ya Kenizzi yaamukoba ati: “Oidhi Musengwa Katonda kye yakoba Musa omusaadha we, ekigema ku iwe ni ku nze, nga tuli e Kadeshi Barinea.

⁷ Agho nali ndi ku myaka amakumi ana egy'obukulu, Musa omugheereza wa Musengwa Katonda bwe yantuma okuja okukeeta ensi eno nga tuviira e Kadeshi Barinea. Naira naamukobera kyenekyene kye twabona.

⁸ Abantu be naja nabo, baira baatiisa abantu. Aye nze naasigala nga ndi mwesigwa eri Musengwa Katonda wange.

⁹ Olw'okuba nakola ntyo Musa yatusuubiza ati nze n'abaana bange, tuja kugheebwa eitaka eryo lye natambuliraku, libe lyaife.

¹⁰ Aye mperaano bona, ghaakabitagho emyaka amakumi ana n'etaanu kasookanga Musengwa Katonda akoba Musa ekyo. Ebyo byali nga n'ebiseera Abaisiraeli ghe twabeerera mu irungu nga tuli kutambula okulibitamu, era Musengwa Katonda akaakuuma ekisuubizo kye, akandeseegho nga ndi mulamu. Nningaaku! Buti ndi ku myaka kinaana n'etaanu egy'obukulu.

¹¹ Nkaali n'amaani gange ng'oti ni bwe nali nago Musa ghe yantumira. Ndimu amaani ag'okulwana oba okukola ekintu ekindi kyonakyona.

¹² Agho ni kyenva nsaba nti mpa ebiketezo ebyo ebirimu ensozi, Musengwa Katonda bye yansuubiza ku olwo kuba wawulira ku olwo nga bw'eriyo Abanaki, abantu abawaigufu, mu bibuga ebyezungulwirwa ebimante ebigumu. Musengwa Katonda aghanga okuba ninze, naababingamu nga Musengwa Katonda bwe yakoba.”

¹³ Agho Yoshua yaasabira Kalebu enkabi era yaamugha ekibuga Heburoni ng'omugabo gwe.

¹⁴ Ni ye buli eno Heburoni n'obutaka obwa baidhukulu ba Kalebu mutabane wa Yefunne Omukenizzi, olw'okuba yawulira era yaagondera Musengwa Katonda, Katonda wa Isiraeli.

¹⁵ Ng'ekyo kikaali kubaagho Heburoni kyayetebwanga kibuga kya Araba. Araba nga n'asinga bukologho mu bantu abawaigufu abaayetebwanga Abanaki. Olwo ensi yaafunaku akalembereza, entalo dhaasiriikiriramu.