Yoshua 13 - Baibuli Ekibono kya Katonda 2014

Ebiketezo ebyali nga bikaali kunhagibwa

¹ Agho Yoshua bweyali ng'akairiighe inho, Musengwa Katonda yaamukoba ati: “Okairiighe inho aye ghakaaligho ekiketezo kinene ekiri n'okunhagibwa:

² ekiketezo eky'Abafilisiti n'eky'Abageshuri.

³ Ekiketezo kino, kiva ku mwiga Shihori, oguli e buvandhuba wa Misiri okwira ku luuyi olw'omukono omugooda olw'e buvandhuba, okutuuka ku nsalosalo ni Ekuroni. Era kitwalibwa ng'eky'Abakanaani, era nga kirimu abafuzi bataanu ow'e Gaza, ow'e Ashidodi, ow'e Ashikeloni, ow'e Gathi n'ow'e Ekuroni. Ekiketezo ekindi n'eky'e Avvimu

⁴ ekiri ku luuyi olw'omukono omusaadha olw'e buvandhuba. Ghaligho ekiketezo eky'Abakanaani kyene, ghaabaagho ni Meara ekyali eky'Abasidoni ekituuka e Afeki ku nsalosalo n'Abamori.

⁵ Ghaligho ekiketezo eky'Abagebali n'eky'e Lebanoni kyonakyona ekiri e buvandhuba ow'e Baalagada nga kiva ku luuyi olw'omukono omusaadha ogw'olusozi Herimoni ku ngira eja e Hamathi.

⁶ Era ghaligho ekiketezo eky'Abasidoni kyonakyona ababa ghagati gh'ensozi dha Lebanoni ni Misirefothi Maimu kyona kiri n'okunhagibwa. Nze mwene ndidha kubingangayo abantu mu buli kiketezo Abaisiraeli ghe banaatuukanga. Iwe ky'oli n'okukola, n'okubagabaniamu ebiketezo ebyo nga bwe nakulagira.

⁷ Kale ni mperaano ebiketezo ebyo bigabaniemu mu bika omwenda n'ekitundu eky'ekika eky'Abamanasse.”

Engabania ey'ekiketezo eky'e buvandhuba wa Yorudani

⁸ Ebika bino: eky'Abareubeni, n'eky'Abagadi, n'ekitundu eky'ekika eky'Abamanasse, byali byamala okufuna ekiketezo Musa omugheereza wa Musengwa Katonda kye yabigha, nga kiri e buvandhuba wa Yorudani.

⁹ Ekiketezo kino, kyali kiva ku Aroeri ekiri kumpi n'ekiiko ekirimu omwiga Arunoni, kyatwalizaamu ekibuga ekiri ghagati mu kiiko, era kyatwalizaamu n'omuseetwe oguva e Medeba okutuuka e Diboni.

¹⁰ Era kyeyongera kyatuukira irala ku nsalosalo ni Ammoni nga kitwaliizaamu ebibuga byonabyona ebyali bifugibwa Sihoni kyabazinga Omuamori ow'e Heshiboni.

¹¹ Era kyatwalizaamu Gileadi n'ekiketezo eky'Abageshuri, n'eky'Abamaka, n'olusozi Herimoni lwonalwona, ni Bashani yeenayeena okutuuka e Saleka.

¹² Era kyatwalizaamu obwakyabazinga bwa Ogi ow'e Bashani. Ono yafugiranga mu bibuga bibiri, eky'e Ashitarothi n'eky'Ederei, era n'eyasembayo mu lulyo olw'abantu abawaigufu abaayetebwanga Abarefa. Bano Musa yabaghangula era yaababingamu.

¹³ Aye ate Abaisiraeli tibaabinga Bageshuri na Bamaaka, era nga baba nabo ghalala okutuusa ni ye buli eno.

¹⁴ Ekika eky'Abalevi ni kyonka Musa ky'ataagha mugabo. Omugabo gwaibwe nga guli na kuva ku ebyo ebigheebwayo eri Musengwa Katonda nga byokerwa ku alutaari nga Musengwa Katonda oyo bwe yalagira Musa.

Ekiketezo ekyagheebwa Abareubeni

¹⁵ Musa yali amaze okugabira ekika eky'Abareubeni obutaka bwaibwe ng'ajiira ku nda edhaali mu kika omwo.

¹⁶ Ekiketezo kyaibwe kyali kiva ku Aroeri ekiri kumpi n'ekiiko ekirimu omwiga Arunoni, kyatwalizaamu ekibuga ekiri ghagati mu kiiko ekyo, n'omuseetwe ogwezungulwire ekiketezo eky'e Medeba.

¹⁷ Era kyatwalizaamu ni Heshiboni n'ebibuga ebindi byonabyona ebikiriiraine ebiri ku museetwe ogwo, era ni bino: Diboni, Bamothi Baali, Bethi Baalimeoni,

¹⁸ Yahaza, Kedemothi, Mefaathi,

¹⁹ Kiriathaimu, Sibuma, ni Zerethi Shahara ekiri ku kasozi akali mu kiiko.

²⁰ Era ni Bethipeori ekiketezo eky'omu maserengeta ag'olusozi Pisiga ni Bethi Yeshimothi.

²¹ Era n'ebibuga byonabyona eby'oku museetwe aghalala n'obwakyabazinga bwonabwona obwa Sihoni Omuamori eyafugiranga e Heshiboni n'abakulu ab'ebikunsu bano be yafuganga nabo Midia: ow'e Rekemu, ow'e Zuri, ow'e Huri, n'ow'e Reba. Aye Musa yabaghangula boonaboona yaabanhagaku ebiketezo byaibwe.

²² Era mu bantu Abaisiraeli be baita n'omwali Balaamu omulaguzi era mutabane wa Beora.

²³ Mu bugwandhuba Abareubeni nga bakoma ku Yorudani nga n'ensalosalo. Ebibuga ebyo byonabyona n'ebyalo byaku n'ebyabagheebwa ng'omugabo era ng'obutaka bwaibwe, nga bajiira ku nda edhaali mu kika omwo.

Ekiketezo ekyagheebwa Abagadi

²⁴ Musa yali amaze okugabira ekika eky'Abagadi obutaka bwaibwe ng'ajiira ku nda edhaali mu kika ekyo.

²⁵ Ekiketezo kyaibwe kyali kitwalizaamu Yazeri, n'ebibuga bya Gileadi byonabyona. Era kyatwalizaamu ekitundu eky'ekiketezo eky'Abammoni okutuukira irala ku Aroeri ekiri e buvandhuba wa Rabba.

²⁶ Era nga kiva e Heshiboni kyatuuka e Ramathi Mizipe era n'e Betonimu. N'okuva e Mahanaimu okutuuka ku nsalosalo ni Lidebiri.

²⁷ Era kyatwalizaamu ebibuga bino ebyali mu kiiko ekirimu Yorudani: Bethiharamu, Bethinimura, Sukkothi, ni Zafoni ekiketezo kino n'ekyafiikagho ku bwali obwakyabazinga bwa Sihoni eyali kyabazinga ow'e Heshiboni. Era omwiga Yorudani nga n'ogukola ensalosalo yaibwe ey'e bugwandhuba okutuukira irala ku Nhandha Galilaaya ku luuyi olw'omukono omugooda ng'olingiriire olw'e buvandhuba.

²⁸ Ebibuga ebyo n'ebyalo byaku n'ebyagheebwa Abagadi ng'omugabo era ng'obutaka bwaibwe, nga bajiira ku nda edhaali mu kika omwo.

Ekiketezo ekyagheebwa Abamanasse e buvandhuba

²⁹ Musa yali amaze okugabira ekitundu eky'ekika eky'Abamanasse obutaka bwaibwe ng'ajiira ku nda edhaali mu kitundu eky'ekika ekyo.

³⁰ Ekiketezo kyaibwe nga kija kyatuuka e Mahanaimu era nga kitwalizaamu Bashani yeenayeena, obwali obwakyabazinga bwa Ogi, era ng'omwo n'omuli ebyalo bya Yaira eby'e Bashani nkaaga.

³¹ Era kyatwalizaamu ekitundu ku Gileadi, era kyatwalizaamu ebibuga bino: Ashitarothi ni Edurei ebibuga bino kyabazinga Ogi owa Bashani mwe yafugiranga. Bino byonabyona byagheebwa edhindi ku nda edha baidhukulu ba Makiri mutabane wa Manasse.

³² Atyo Musa bwe yagabaniamu Abaisiraeli ekiketezo ky'e Moabu ekiri e buvandhuba wa Yeriko ni Yorudani.

³³ Aye ekika eky'Abalevi tiyakigha mugabo. Yabakoba ati omugabo gwaibwe gwidha kuvanga ku binaagheebwangayo eri Musengwa Katonda wa Isiraeli.