Yoshua 11 - Baibuli Ekibono kya Katonda 2014

Yoshua aghangula Yabini ghalala n'abairuukirize be

¹ Kyabazinga Yabini ow'e Hazori bwe yawulira ku bughanguzi obw'Abaisiraeli, yaagheereza obukwenda eri bakyabazinga abaali bamuliiraine. Bano baali: Yobabu kyabazinga ow'e Madoni, ni kyabazinga ow'e Shimuroni, ni kyabazinga ow'e Akishafu.

² Era yaagheereza obukwenda eri bakyabazinga ab'omu biketezo eby'oku nsozi ku luuyi olw'omukono omugooda olw'e buvandhuba, era n'ab'omu kiiko ekirimu omwiga Yorudani, n'ab'oku luuyi olw'omukono omusaadha olw'e buvandhuba w'enhandha Kinnerothi n'ab'omu biketezo eby'omu biiko, era n'ab'omu biketezo eby'oku nhandha kumpi ni Dori.

³ Era yaagheereza obukwenda eri Abakanaani e buvandhuba n'e bugwandhuba bwa Yorudani, n'eri Abamori, Abahitti, Abaperizzi, n'Abayebusi abaali mu biketezo eby'oku nsozi, era n'eri Abahivi ab'e Mizipa mu kiketezo ky'omu kiiko ky'olusozi Herimoni.

⁴ Baidha n'amagye gaibwe goonagoona, baaba abalwani kamaala inho, nga bali ng'oti musenho gwa ku nhandha. Baaba n'embalaasi n'ebigaali eby'omu lutalo kamaala.

⁵ Bakyabazinga bano boonaboona beeyimba, baidha baasimba weema dhaibwe ghalala e Meromu ku mwiga, okulwana n'Abaisiraeli.

⁶ Musengwa Katonda yaakoba Yoshua ati: “Abo otabatya kuba ndidha kubaita boonaboona, idho ku saawa ng'oti ni dhino banaaba bafiire. Embalaasi dhaibwe mwidha kudhisala eminho, n'ebigaali byaibwe eby'omu lutalo mubyokye.”

⁷ Kale Yoshua n'abasaadha be baazinduukiriza abazigu bale, baabagwaku nga tibabeetegekeire, agho e Meromu ku mwiga.

⁸ Musengwa Katonda yaagha Isiraeli obughanguzi, baabingirira abazigu baibwe baabalwanisa okubatuukiza irala mu kibuga Sidoni Ekikologho n'e Misirefothi Maimu ku luuyi olw'omukono omugooda ng'olingiriire e buvandhuba. Era baababingirira n'okubatuukiza irala mu kiiko eky'e Mizipa ku luuyi olw'e buvandhuba. Baaja nga babalwanisa okutuusa lwe baabamalagho okubaita.

⁹ Yoshua yaabakola nga Musengwa Katonda bwe yamulagira: yaasala embalaasi dhaibwe eminho, era yaayokya ebigaali byaibwe eby'omu lutalo omuliro.

¹⁰ Mu biseera ebyo, obwakyabazinga obw'e Hazori, bwali nga n'obusinga amaani mu kiketezo ekyo. Agho Yoshua n'abasaadha be baakyuka baabulumba era baabughangula.

¹¹ Baita abantu boonaboona abaali mu kibuga Hazori, era ekibuga ekyo baakyokya omuliro.

¹² Yoshua yaagema ebibuga eby'omu kiketezo ekyo byonabyona, yaita bakyabazinga baamu n'abantu baibwe boonaboona, nga Musa omugheereza wa Musengwa Katonda bwe yalagira.

¹³ Aye ghazira kibuga kyonakyona kyazimbibwa ku kasozi, Baisiraeli kye baayokya okutoolaku Hazori Yoshua kye yayokya.

¹⁴ Ebintu byonabyona Abaisiraeli bye baanhaga mu bibuga ebyo era n'ebyayo, baabyetwalira, aye abantu boonaboona nga babaita aghazira kulekagho naire mulala nga mulamu.

¹⁵ Nga Musengwa Katonda bwe yalagira Musa omugheereza we, yeena Musa bwe yalagira Yoshua. Era Yoshua oyo yaakola byonabyona Musengwa Katonda bye yalagira Musa aghazira kulekayo naire ekintu ekirala.

Ebiketezo Yoshua n'abasaadha be bye baanhaga

¹⁶ Bino n'ebiketezo Yoshua n'abasaadha be bye baanhaga: ebiketezo eby'ensozi n'eby'oku luuyi olw'omukono omugooda olw'e buvandhuba, ebiketezo by'e Gosheni n'eby'omu kiiko, ebiketezo eby'e Araba, ebiketezo bya Isiraeli eby'ensozi n'eby'omu kiiko,

¹⁷ ebiketezo ebiva ku lusozi Halaka oluli ku mukono omusaadha ng'olingiriire e buvandhuba kumpi ni Edomu, okutuuka e Baalagada ku mugooda ng'olingiriire e buvandhuba mu kiiko ekirimu Lebanoni, ku luuyi olw'omukono omusaadha olw'olusozi Herimoni ng'olingiriire e buvandhuba. Yoshua yaghangula bakyabazinga boonaboona ab'omu biketezo ebyo, yaabaita

¹⁸ waire nga kyamutwalira ekiseera kireeyi okubalwanisa.

¹⁹ Ebibuga byonabyona byanhagibwanga nga bimaze kughangulwa mu lutalo, okutoolaku Abahivi ab'e Gibeoni abaakola endagaano n'Abaisiraeli.

²⁰ Musengwa Katonda n'eyaleeteranga abantu abo, okukanaghala ni balwana n'Abaisiraeli. Olwo basalirwe omusango gubasinge, era bazikirizibwe aghazira kusaasirwa, nga Musengwa Katonda bwe yalagira Musa.

²¹ Mu kiseera ekyo, Yoshua yaja yaazikiriza olulyo olw'abantu abawaigufu abaayetebwanga Abanaki, abaabanga mu bibuga Heburoni, Debiri, Anabu, ni mu biketezo byonabyona eby'ensozi eby'omu Buyudaaya ni mu Isiraeli. Yoshua yabazikiriza boonaboona n'ebibuga byaibwe.

²² Mu biketezo byonabyona eby'Abaisiraeli timwasigala Muanaki waire mulala, okutoolaku abatonotono abaasigalaku mu Gaza, Gathi ni mu Ashidodi.

²³ Kale atyo Yoshua bwe yanhaga ekiketezo ekyo kyonakyona eky'ensi, nga Musengwa Katonda bwe yalagira Musa. Yoshua yaamala yaakigabaniamu mu Baisiraeli boonaboona, buli kika nga kifunaku aghaakyo. Agho abantu baalekera okulwana entalo baafunaku emiraala.