Yoshua 1 - Baibuli Ekibono kya Katonda 2014

Katonda alonda Yoshua okukulemberamu Abaisiraeli

¹ Musa omugheereza wa Musengwa Katonda bwe yafa, Musengwa Katonda yaayogera ni Yoshua, mutabane wa Nuni, eyali omuyambi wa Musa yaamukoba ati:

² “Musa, abaire omugheereza wange, yafa. Kale ni, iwe weetegeke n'Abaisiraeli abandi boonaboona, musomoke omwiga Yorudani, mwingire mu nsi ye ndi kubagha.

³ Nga bwe nakobera Musa, kiisi ghe munaaniina ekigere woonawoona mbaghairegho.

⁴ Ekiketezo kyaimwe kiidha kuvanga ku irungu okutuuka ku nsozi dh'e Lebanoni, n'okuva ku mwiga omunene Eufurate oguli e buvandhuba, nga mutwaliizaamu ensi yoonayoona ey'Abahitti, mutuuke ku Nhandha Eyaghagati ku luuyi olw'e bugwandhuba.

⁵ Ndidha kubanga n'iwe buliidho nga bwe nabanga ni Musa. Tija kukulekulira agho naire. Ezira muntu aja kukughangula, enaku dhoonadhoona dh'olimala ng'oli mulamu ku nsi.

⁶ Banga mumalirivu era atatya. Niiwe oja okukulemberamu abantu bano obaleetere okutwala ensi ye nabasuubiza okubagha nga mbita mu badhaadha baibwe.

⁷ Iwe ky'oli n'okukola, n'okuba n'obumalirivu era n'obutatya nga weegendereza okugondera amateeka goonagoona, omugheereza wange Musa ge yakugha. Togavangaku waire akatono kati, olwo buli kintu kiidha kukujiiranga bukalamu woonawoona.

⁸ Ebiri mu kitabo kino eky'Amateeka bitakuvanga ku munwa. Bisomenga omusana n'obwire era ng'ogondera byonabyona ebyaghandiikibwamu. Olwo ebintu byonabyona biidha kukujiiranga bukalamu ng'ezira kikulema.

⁹ Oteerabira kye nkulagiire nti: Banga mumalirivu era atatya, otatiribiranga oba okuwaamu amaani, kuba Nze Musengwa Katonda wo ndidha kubanga n'iwe buli gh'oja.”

Yoshua agha abantu ebiragiro

¹⁰ Agho Yoshua yaalagira abakulembeze ab'abantu mu Isiraeli ati:

¹¹ Mubitebite mu bantu eyo mu weema dhaibwe ye bali mu bakobe muti: “Mwetegekereyo emere ey'omu lugendo, kuba olwadhuuzi muja okusomoka omwiga Yorudani okuja okutwala ensi, Musengwa Katonda waimwe y'ali kubagha.”

¹² Yoshua yaakoba ab'ekika kya Abareubeni, n'ab'ekika ekya Abagadi, n'ekitundu eky'ekika ekya Abamanasse ati:

¹³ “Mwidhukire, nga Musa eyali omugheereza wa Musengwa Katonda yabakobera ati Musengwa Katonda waimwe yabasuubiza okubagha ekiketezo kino eky'e buvandhuba ew'omwiga Yorudani kibe obutaka bwaimwe.

¹⁴ Agho ni muleke bakazi baimwe n'abaana baimwe abato basigale ghano, era n'ebyayo byaimwe byona bisigale ghano. Aye abasaadha boonaboona abasobola okulwana basomokenga bakulemberemu Baisiraeli banaibwe era bababeerenga,

¹⁵ okutuusa boona lwe balitwala ekiketezo kyaibwe eky'e bugwandhuba ew'omwiga Yorudani, Musengwa Katonda waibwe ky'ali kubagha. Musengwa Katonda bw'aligha ebika byonabyona eby'Abaisiraeli okutyama ni bitereera mu biketezo byabyo, olwo mwena muliira mwatyama ghano mu kiketezo kyaimwe Musa omugheereza wa Musengwa Katonda kye yabagha.”

¹⁶ Baamwiramu bati: “Twidha kukolanga byonabyona by'otukobye, era twidha kujanga woonawoona gh'onaatukobanga okuja.

¹⁷ Era twidha kukugonderanga buliidho nga bwe twagonderanga Musa. Tusaba bwa Musengwa Katonda wo, abenga n'iwe nga bweyalinga ni Musa.

¹⁸ Oyo yeenayeena ataakuwulirenga oba anaalobanga okukola ky'omukobye, wa kwitibwanga. Iwe banga mumalirivu era atatya.”