Yona 4 - Baibuli Ekibono kya Katonda 2014

Yona asungughala nga Katonda asaasiire

¹ Kino kyaleetera Yona okusungughala ebitakobeka.

² Agho yaakoba ati: “Wo Musengwa Katonda, bino ti bye nakoba nga nkaali mu nsi yange? Nze namanha ng'oli wa kivunika era asaasira einho. Ogonza inho abantu obutalekera era obaguminkiriza buliidho oli mwetegefu okukyusa ebidhuubo byo waaloba kubabonereza. Era kyova obona nali numukiire e Tarushishi.

³ Wo Musengwa Katonda, nkusaba otwale obulamu bwange, kuba mboine ng'okufa kusinga okuba omulamu.”

⁴ Musengwa Katonda n'okumubuuza ati: “Bwenebwene oli mutuufu okusungughala?”

⁵ Agho Yona yaava mu kibuga yaaja ku luuyi olw'e buvandhuba bwakyo yaazimba eyo entindi, yaatyama omwo ng'ateega abone ebinaagwa ku Nineve.

⁶ Musengwa Katonda, Katonda yaamezaagho ekimera agho Yona ghe yali, kyamukolera ekiwoleeze okumuwonia akasana.

⁷ Aye enkeera, endhuba ng'ekaali kuvaayo Katonda yaalagira ekisiisa kyaidha kyalumba ekimera ekyo, kyafaagho.

⁸ Endhuba bwe yavaayo akasana kaidha, Katonda yaatuma empewo ensu ng'eva ku luuyi olw'e buvandhuba, akasana kaayokya Yona mu mutwe kata azirike yeegomba okufa. Yaakoba ati: “Okufa kusinga okuba omulamu!”

⁹ Aye Katonda yaamubuuza ati: “Bwenebwene oli mutuufu okusungughala olw'ekimera ekifiire?” Yona yairamu ati: “Ndi mutuufu, era nsungughaire ekiimala, nhenda kufa.”

¹⁰ Musengwa Katonda yaamukoba ati: “Ekimera kino ky'oli kufaaku einho ti niiwe owakisimba, era ti niiwe owakikuza. Kyamera kyakula igulo irala, olunaku olwokubiri kyafaagho.

¹¹ Memale nze tigwaine kufaayo ku Nineve, ekibuga ekikologho ekyo, ekirimu abaana abaziraku musango abaswika mu mitwalo eikumi n'ebiri (120,000), era nga kirimu n'ensolo kamaala?”