Yona 3 - Baibuli Ekibono kya Katonda 2014

Yona aja e Nineve

¹ Agho Musengwa Katonda yaakoba Yona omukuzi ogwokubiri ati:

² “Situkiramu oje eri abantu ab'omu kibuga Nineve, ekibuga ekikologho ekyo, obakobere obukwenda bwe nakukoba.”

³ Yona yaasitukiramu yaaja e Nineve nga Musengwa Katonda bwe yamukoba. Nineve kyali kikologho, ng'okutambula okukibitamu omala enaku isatu.

⁴ Yona yatoolera okutambula mu kibuga okumala olunaku lulamba, agho yaalangirira ati: “Nga ghabiseegho enaku amakumi ana (40) Nineve kija kuzikirizibwa.”

⁵ Abantu ab'e Nineve baikiriza obukwenda bwa Katonda, era baalangirira buli muntu okusiiba endhala okuviira irala ku babbede okutuukira irala ku basembayo ghansi. Baavaala ekutiya okwoleka okwenenia kwaibwe.

⁶ Kyabazinga w'e Nineve bwe yabiwulira, yaaleka ghale ekityamo kye n'ebivaalo bye eby'obwakyabazinga, yaavaala ekutiya era yaatyama mu ivu okwoleka okwenenia kwe.

⁷ Era yaalangirira mu biketezo byonabyona eby'e Nineve ng'akoba ati: “Kino kiragiro okuva ye kyabazinga n'abakungu be, ekikoba kiti, ‘Ghatabaagho muntu yeenayeena alya oba anhwa kintu kyonakyona, oba okuganha ekisolo kyonakyona eky'omuntu okulya oba okunhwa.

⁸ Buli muntu ateekwa okwesiba ekutiya, na buli nsolo esibibwe ekutiya. Buli muntu ateekwa okulekayo ebibi by'akola n'ebikolwa eby'obukambwe, yeeghembe Katonda n'omwoyo mulala okumusonigha.

⁹ Tomanha, oba katyo Katonda asobola okukyusa ekirowoozo kye, yaalekera okusungughala ekibitiriire, yaaloba kutuzikiriza.’ ”

¹⁰ Katonda bwe yabona bino bye baakola, ni balekayo ebikolwa byaibwe ebibi, yaakyusa ekidhuubo kye, yaaloba kubazikiriza nga bwe yali akobye.