Yona 2 - Baibuli Ekibono kya Katonda 2014

Yona asaba Katonda

¹ Yona, ng'ali munda omw'ekyenhandha yasaba Musengwa Katonda we ati:

² “Wo Musengwa Katonda, bwe nali nga ndi mu bizibu nakweta era wampulira wampa kye nakusaba. Bwenali nga mbalirwa mu bafu, tiwansiriikirira nga ndi kukulirira okumbeera.

³ Wali onswire ghala ku ntobo yeene ey'enhandha, omwidhuzo gwa maadhi gwekuluumulula okuneezungulula, okwefuukuula kwago okw'amaani kwamira zeenazeena.

⁴ Nali nkoba nti onswire ere nve gh'oli, era nga tiriirayo kabiri kubona ku isinzizo eitukuvu.

⁵ Nali mu maadhi kata nfe nga ngwire ku ntobo ey'enhandha, ebisubi eby'omu nhandha byaneezingirira ku mutwe.

⁶ Nagwa eyo ensozi ye dhisimuka, endhigi ye dhiigalwa ni dhitaigulwa ebyanda n'ebyanda. Aye iwe Musengwa Katonda wange wantoolayo nga ndi mulamu.

⁷ Wo Musengwa Katonda, bwe nali nga ndi kumpi kufa naidhukira okukusaba, era iwe wampa kye nakusaba ng'oli mu isinzizo lyo eitukuvu.

⁸ Abo abasinza ebitali Katonda ebitagasa, beefiiriza beene obusaasizi bwo.

⁹ Aye nze ndidha kukwembera enhembo edhikusaaka, nkugheereze omusengo era ntuukirize ebyo bye neeyama. Ghazira wundi alokola okutoolaku Musengwa Katonda.”

¹⁰ Agho Musengwa Katonda yaalagira ekyenhandha kyasesema Yona ku bukalu.