Yoeli 3 - Baibuli Ekibono kya Katonda 2014

Katonda alisalira amaghanga omusango

¹ Musengwa Katonda akoba ati: “Bona eno, mu kiseera ekyo kyene ndireetera abantu b'omu Buyudaaya n'ab'omu Yerusalemu, ebintu byairamu okubajiiranga obukalamu kabiri.

² Ndisoloza abamaghanga goonagoona, naabatwala mu kyetebwa Ekiiko kya Yehoshafati. Era nga bali eyo, ndibasalira omusango olw'ebyo bye baakola ku bantu bange Abaisiraeli kuba baabasansaaniza eyo mu maghanga, era baagabana ensi yange Isiraeli.

³ Baakubira obululu ku bantu bange, baaghaayo abalenzi okusasulira abakazi bamalaaya, era baaghaayo abaghala okubagulamu omwenge, era baagunhwa.

⁴ “Muli kugezaaku kunkola ki, imwe ab'e Tiro, n'ab'e Sidoni, n'ab'omu biketezo by'e Filisitia? Ghaligho kye muli kwenda okuneesasuulizaaku? Oba nga ekyo kye muli kwenda, nze mwene ndibeesasuulizaaku imwe amangu n'embiro, olw'ebikolwa byaimwe.

⁵ Olw'okuba mwatoola feeza wange ni zaabu wange, mwatoola n'eby'obukombe byange, mwabitwala mu masabo gaimwe.

⁶ Mwatoola abantu b'omu Buyudaaya n'ab'omu Yerusalemu mu nsi yaibwe, mwabatwaliriza eghala, mwabaguza Abagureki.

⁷ Aye mperaano nja kuleetera abantu abo okuva eyo ye mwabatunda, olwo mwena mbeesasuulizeeku nga mbakola kyene ekyo kye mwabakola.

⁸ Ndidha kuleetera batabane baimwe ni baghala baimwe okutundibwa mu Bayudaaya. Ate boona bamale babaguze Abasabea, eighanga eriri eyo eghala einho. Nze Musengwa Katonda, ninze nkobye.

⁹ Mulangirire kino eyo mu maghanga, muti, ‘Mutegeke olutalo; mwete abalwani ab'amaani, mukobe abaisirukale beesoloze baidhe.

¹⁰ Edhibaire embago dhaimwe edh'okulimisa, mudhigheeseemu mpiima dha kulwanisa; n'obusolobyo obw'okuwoolera, mubugheeseemu mafumo ga kulwanisa. N'abanafu boona ka bafuuke balwani.

¹¹ Mwanguye mwidhe, imwe abamaghanga goonagoona ageezungulwire agho, mukole mwesololeze eyo mu kiiko.’ ” Wo Musengwa Katonda, leeta abalwani bo ab'amaani.

¹² “Abantu ab'amaghanga ka basitukiremu, baje mu Kiiko kya Yehoshafati; kuba eyo nze Musengwa Katonda ye ndityama okulamula amaghanga goonagoona ageezungulwire agho.

¹³ Ekibi kyaibwe kye baakola kinene inho! Kale mubasale n'emiwolo ng'oti n'engaano etuuse okukungula. Mubatyankirire ng'oti n'emizabbibu egiidhwire mu kikunhiro eky'omwenge ogw'emizabbibu ni gibanda n'okubanda.”

¹⁴ Abantu enkunkumuli n'enkunkumuli bali mu Kiiko eky'Okusaliramu Omusango, kuba eyo olunaku lwa Musengwa Katonda ye luja okutuukira amangu geene.

¹⁵ Endhuba n'omwezi biirugaire, n'emuunienie dhaalekera okwaka.

Katonda aligha abantu be enkabi

¹⁶ Musengwa Katonda awologoma ku lusozi Sioni era yaakaabuka mu Yerusalemu, eigulu n'ensi byatengeeta. Aye Musengwa Katonda oyo n'ekifo abantu be Abaisiraeli mwe balumukira okwewonia, era n'ekifo mwe beewogoma.

¹⁷ “Olwo mulimanha nga ninze Musengwa Katonda waimwe, era nga mba ku lusozi lwange olutukuvu Sioni. Yerusalemu kiriba kibuga kitukuvu, era abagwira tibaliiramu kukighangula kabiri.

¹⁸ Mu kiseera ekyo, ensozi dhiriidhula enimiro dh'emizabbibu, n'obusozi bwaidhula ente edhikamwa. Obwiga bw'omu Buyudaaya bwonabwona buliidhula amaadhi. Era ghalibaagho ensulo ey'amaadhi erikuuluula ng'eva mu isinzizo lya Musengwa Katonda, yaaja yaafukirira Ekiiko eky'e Shittimu.

¹⁹ Ensi Misiri erifuuka irungu, n'ensi Edomu yaafuuka bifulukwa byereere; kuba abantu b'omu nsi edho baalumba Buyudaaya, baita abantu abaziraku musango.

²⁰ Aye mu Buyudaaya ni mu Yerusalemu, mwidha kubangamu abantu ebyanda n'ebyanda.

²¹ Ndyesasuuza olw'omusaayi gw'abo abaitibwa aghazira kusaasira muntu yeenayeena aliku musango. Era nze Musengwa Katonda ndidha kubanga mu Sioni.”