Yoeli 1 - Baibuli Ekibono kya Katonda 2014

¹ Buno n'obukwenda Musengwa Katonda bwe yatuma Yoeli mutabane wa Pethueli aje akobere abantu.

Abantu balira olw'okuzikirizibwa okw'ebirime

² Imwe abantu abakaire, muwulire kino imwe mwenamwena ab'omu mu Buyudaaya, mutege amatu. Ekintu ng'oti ni kino kibangaghooku mu biseera byaimwe oba mu bya badhaadha baimwe?

³ Mukikoberenga abaana baimwe, boona bakikoberenga abaana baibwe, n'abo boona bakoberenga ab'oluse oluliiragho.

⁴ Ebikuukuulu n'ebikuukuulu eby'enzige byaidha, byagwa ku bisimbe; nga buli kikuukuulu ekisookagho kirya nga bwe kisobola, ate bye kireseegho byaliibwa ekikuukuulu ekindi ekiiragho.

⁵ Imwe abatamiivu, muzuuke mulire amaziga; muwowoole imwe abanhwa omwenge; kuba emizabbibu mwe bakola omwenge ogubawoomera gizikiriziibwa!

⁶ Eigye ery'enzige lirumbye ensi yaife. Dhiri kamaala inho edhitabalika era nga dha maani. Amaino gaadho masongovu era moogi ng'oti ga mpologoma.

⁷ Dhaazikiriza emizabbibu gyaife, dhaaguguna n'emiti gyaife emitiini. Dhaagimalaku ebiwuudhu byonabyona era ensaga dhaagyo dhaalanguka ng'obona bwa byeru.

⁸ Mulire amaziga imwe, ng'oti n'omughala omwegha eyeesibye ekikaakaati, ng'alirira omusaadha afiire y'abaire aja okufumbirwa.

⁹ Bakabona abagheereza Musengwa Katonda bali mu kulira maziga; kuba tighakaali bigheebwayo bya mere ya mpeke, waire ebigheebwayo eby'okunhwa bye batwala mu isinzizo lya Musengwa Katonda.

¹⁰ Enimiro dhaazika, eitaka lyawolongera; kuba engaano yazikirizibwa, emizabbibu mwe bakunha omwenge gyaniala, n'ebibala eby'emiti emyoliva mwe bakamula omuzigo byakala.

¹¹ Imwe abalimi munakughale; imwe abalabirira emizabbibu muwowoole. Kuba engaano, ni Sayiri, n'ebindi byonabyona ebikungulwa bizikiriire.

¹² Emizabbibu n'emitiini gyaniala. Emikomamawanga, n'eminaazi, n'emiti egindi gyonagyona egy'ebibala gyakala. Era eisanhu mu bantu lyabula.

¹³ Imwe bakabona muvaale ekutiya mulire enaku, muwowoole imwe abagheereza ku alutaari. Imwe abagheereza ba Katonda wange, mwingire mu isinzizo musule nga muvaire kutiya olw'okunakughala; kuba tighakaali bigheebwayo bya mere ya mpeke waire ebigheebwayo eby'okunhwa ebireetebwa mu isinzizo lya Katonda waimwe.

¹⁴ Mulangirire ghabeegho okusiiba, mwete abantu beesoloze ghalala. Musoloze abakulembeze n'abantu boonaboona ab'omu Buyudaaya, baidhe mu isinzizo lya Musengwa Katonda waimwe, mumulirire amaziga, ababeere.

¹⁵ Tukagwireku! Olunaku lwa Musengwa Katonda luli kumpi; olunaku oyo Aghanga Ebintu Byonabyona lw'alireeteraku okuzikirira.

¹⁶ Ebirime byaife babizikiriiza nga tulingiriire tuti, n'eisanhu lyawaagho mu isinzizo lya Katonda waife.

¹⁷ Ensigo dhaife dhifiira mu biwumpu eby'eitaka eikalu. Amaterekero gawolongeire gaayonooneka, kuba tighakaali mere ya kugaterekamu.

¹⁸ Wulira ensolo nga bwe dhirira! Ente dhisobeirwa olw'okubulwa eisubi ery'okulya. N'entaama dhoona dhiri kudaagadaaga.

¹⁹ Wo Musengwa Katonda, niiwe ye ndirira, kuba eisubi mu byayiro n'emiti mu nsiko bikaze ng'oti babyokiikya bwa muliro.

²⁰ N'ensolo edh'omu nsiko dhikulirira, olw'amaadhi agaakala mu miiga n'olw'eisubi eryakala mu byayiro ng'oti lye bookiikya omuliro.