Yobu 9 - Baibuli Ekibono kya Katonda 2014

Yobu aidhi nga tikisoboka kuwoza ni Katonda

¹ Agho Yobu yairamu ng'akoba ati:

² “Bwenebwene ndidhi ng'ebyo bityo bwe biri. Aye omuntu aghanga atya okuwoza ni Katonda, n'asinga?

³ Bw'ayenda okuwoza naye, Katonda asobola okubuuza ebibuuzo olukumi (1,000), omuntu yaalemwa okwiramu waire ekirala.

⁴ Katonda mugezi era wa maani. Naani aghanga okumwetantala? Ghazira aghanga kwetantala Katonda.

⁵ Asiguukulula ensozi ng'azira y'akobeireku, yaadhisaaniagho mu busungu bwe.

⁶ Aleetera ensi okutengeeta mu kifo kyayo, era yaaleetera empango kw'etyaime okuyuuga.

⁷ Alobera endhuba okuvaayo; yaaghemba ku muunienie dhaaloba kwaka.

⁸ Yabamba eigulu yenka, yaawoza okwefuukuula okw'enhandha.

⁹ Yaghanika emuunienie mu ibbanga ku luuyi olw'omukono omugooda olw'e buvandhuba, ni ku luuyi olw'omukono omusaadha olw'e buvandhuba, era ni ghagati gh'endhuyi edh'oku mikono egyo gyombi.

¹⁰ Akola eby'amaani bye tutategeera, n'ebyewuunhio ebitabalika.

¹¹ Bwenebwene ambitaku, naaloba kumubona aja, aye naaloba kutegeera ng'abiseegho.

¹² Bw'atwala ekintu kyonakyona ky'ayenda, naani asobola okumulobera? Naani akana okumubuuza ati, ‘Oli kukola ki ekyo?’

¹³ Obusungu bwa Katonda tibukoma, aghangula abazigu be, abayambi ba Rahabu.

¹⁴ Kale nsobola ntya okufuna ebibono eby'okumwiramu nga ndi kwewozaaku?

¹⁵ Waire nga nziraku musango, tisobola kwewozaaku, aye nsaba bwa Katonda oyo omulamuzi wange ansaasire.

¹⁶ Ni bwe nandimwese okwidha okuwoza n'aganha, tinandiikiriiza nti awuliire kye nkoba.

¹⁷ Ankubisa kiwunga yantentena, yandhidhuza ebinuubule ku mubiri aghazira nsonga.

¹⁸ Tanganha kugheeraku naire, aye anhongera bwa nnaku.

¹⁹ Bwe kuba kwegera maani, mwene yenka n'aligho! Bwe kuba kuwoza musango, naani aghanga okumweta, n'aganha okwidha okuwoza?

²⁰ Waire nga nziraku musango, bye ndhogera bigunsinza. Waire nga nziraku kye baananga, mwene ayoleka nga bwendi omukyamu.

²¹ Nziraku musango aye neesiniirwa obulamu.

²² Byonabyona n'ekirala era kye nva ni nkoba nti, azikiriza abaziraku musango n'abakozi b'ebibi.

²³ Akabi bwe kagwagho ni kaitiragho abantu, Katonda asekerera abantu abo abaziraku musango abagwiriirwa ekibamba ekyo.

²⁴ Yaghaayo ensi mu mikono gy'ababi bagifuge. Aghemba ku maiso g'abalamuzi balobe kusala misango mu butuufu. Oba Katonda ti n'akola ebyo, kale naani?”

Yobu akoba ati Katonda asaliriza emisango

²⁵ “Enaku dhange dhirumuka embiro okusinga omulumusi; dhiwaaku nga nze tidhifuniemu kalungi.

²⁶ Dhibita bubite ng'oti n'amaato ag'embiro, era ng'oti n'enkookooma eika ku muyiigo gwayo.

²⁷ Bwe nkoba nti, ‘Ka neerabire okwemuluguunhia kwange, mmwenheku, nsangaale,’

²⁸ ndidhula okutya olw'okudaazibwadaazibwa kwange kuba ndidhi nti Katonda talikobaku ati nziraku musango.

²⁹ Nkiidhi nti omusango guli n'okunsinga, kale ndaagira ki okwewozaaku?

³⁰ Ni bwenaaba amaadhi, ni ntukuza engalo dhange ni saabbuuni,

³¹ era oidha kunsuula mu kiina ekiidhwire obunhaga, n'engoye dhange dhineesinwe.

³² Kuba ngoli Katonda abaire muntu buntu nga nze, nandimwizeemu, naawoza naye.

³³ Aye ghazira mulamuzi ghagati wange naye, anaatuwozesa n'atusaliragho.

³⁴ Neeghemba Katonda alekere agho okunkubisa omwigo gwe; alekere agho okunzindula n'okuntiisa.

³⁵ Memale olwo nsobole okweinhonholaku nga bwe nandyenze.”