Yobu 8 - Baibuli Ekibono kya Katonda 2014

Bilidadi akoba Yobu ati Katonda wa mazima

¹ Agho Bilidadi Omushuhi yairamu ng'akoba ati:

² “Onaatuusa gha okwogera ebibono ebyo, ebiri ng'empewo obuwewo?

³ Bwenebwene Katonda asobola okusaliriza ensonga? Oyo Aghanga Ebintu Byonabyona, asobola okugha ensala etali ntuufu?

⁴ Abaana bo bateekwa okuba nga baakola ekibi baamusungughaza, kyeyava n'abagha ekibonerezo kyaibwe ekibasaana.

⁵ Aye bw'onaakyuka n'ogondera Katonda, era n'omweghemba oyo Aghanga Ebintu Byonabyona,

⁶ era bw'onaaba omwesimbu ng'oli mulongoofu, Katonda oyo taalobe kwidha kukubeera, nakukwirizaagho maka go agakusaaniire.

⁷ Ebintu bye wafiirwa mu kusooka byali bitono inho, bw'obigerangerania ku ebyo by'olifuna mu biseera eby'oluvainhuma.”

Bilidadi adhuliza amagezi ag'ab'eira

⁸ “Ndi kukusaba weebuuze ku magezi ag'ab'eira weetegereze badhaadha bye baazuula.

⁹ Kuba obulamu bwaife bumpi, tuzira kye twidhi; enaku dhe tumala ku nsi, dhiri ng'oti kinsense ekibita obubite.

¹⁰ Bwenebwene ab'eira abo baidha kukwegeresa, era bakukobere bye baidhi.

¹¹ Ebitoogo bisobola okukulira aghazira kibali? Ebigada bighanga okukulira aghazira maadhi?

¹² Amaadhi bwe gakala, ebyo n'ebisooka ebimera ebindi byonabyona okuwotoka, waire nga biba bikaali kutuuka kutemebwa bikozesebwe.

¹³ N'abantu abava ku Katonda batyo bwe baba; abatatya Katonda abo tibaba na isuubi.

¹⁴ Ekintu kye beesiga kikutuka ng'oti wuuzi; ekibayinula kinafu ng'oti n'olutuula lwa nabumbuli.

¹⁵ Bwebeesigama ku ndhu dhaibwe, dhigwa bugwe ni bwebadhigemerera, tidhigumiragho.

¹⁶ Baba ng'oti n'ebimera ebiboneka obulungi ng'omusana gukaali kwaka, ensaga dhaabyo ni dheeyandhalira mu nimiro.

¹⁷ Emizi gyabyo gikunkuna mu mmungo y'amabaale, era gyerangira ku buli ibaale.

¹⁸ Aye bwe babiighagho mu kifo ekyo, biba nga tibikaidhukirwa nga byalighooku.

¹⁹ Oboine, eisanhu ery'ababi tiriraalagho kumala ntangama, era ababi abandi bamala baidha baira mu kifo ky'abo.”

Katonda taidha kulekulira agho Yobu

²⁰ Aye Katonda talekulira agho bantu baziraku musango, ate tayamba bakozi ba bibi.

²¹ Aidha kukwiza enseko ku matama, era okube emizira.

²² Aidha kuleetera abakukyagha okuswala einho, era asaaniegho endhu edh'abakozi b'ebibi.