Yobu 7 - Baibuli Ekibono kya Katonda 2014

Yobu yeemuluguunhia ye Katonda

¹ “Obulamu bw'omuntu buba bwa kukakaalukana ku nsi. Enaku dhe dhoonadhoona dhaaba dha kukola mirimo mikalangufu.

² Ng'omwiru bwe yeegomba okuwuumulaku mu kiwoleeze, era ng'omupakasi bw'asuubira empeera ye,

³ zeena ntyo bwemala emyezi n'emyezi nga ghazira mugaso gwe nfuniemu, era obwire bwaira ku bwinaabwo nga nzira bugheereso.

⁴ Bwenambaala obwire buba ng'oti n'obutaakye; neegalula mu buliri, neesinwa, naakoba mule nti, ‘Obwire bunaakya li?’

⁵ Omubiri gwange gwidhwire enhengere n'eiko; era gwidhwire bikobolo ebyesala ni bivaamu amasira.

⁶ Enaku edh'obulamu bwange dhiziinhuuka okusinga empiso ey'ekyalaani; dhiwaaku mangu nga nzira isuubi lye ndi na lyo.

⁷ Wo Katonda wange, idhukira nti obulamu bwange muuka buuka, tiriirayo kufuna isanhu.

⁸ Eriiso ly'oyo aningirira buti tiririirayo kumbonaku kabiri; amaiso go galiinoonia aye nga tikaaligho.”

Yobu asungughalira Katonda

⁹ “Ng'ekire bwe kiwaagho ni kibula, n'omuntu aika e magombe atyo bw'atairayo kuboneka.

¹⁰ Tairayo kuba mu maka ge kabiri, waire abo be yabanga nabo okumwidhukira.

¹¹ Kale tiidha kusirika, ndidha kulira obughafu bwange, ndidha kwogera enaku endi ku mwoyo.

¹² Olowooza oti nze ndi nhandha oba ogusota ogw'omu nhandha, memale onteeku abankuuma?

¹³ Bwe nkoba nti, ‘Ekitanda kyange ka kimpegheezeeku; obuliri bwange buneerabizeeku ku kwemuluguunhia kwange,’

¹⁴ iwe ontiisa n'ebirooto, wandholeka ebinzindula.

¹⁵ Nze mmala gatugibwa naafa, ntabaire magumba meereere nti.

¹⁶ Neesiniirwa obulamu tikaayenda kubaagho nga ndi mulamu. Ndeka, kuba obulamu bwange bwa kaseera buseera.

¹⁷ Omuntu katyo ni, ki iwe okumufaaku n'okumudhuuba,

¹⁸ era n'okumwekebeedha buli nkyo, n'okumuleba buli kaseera?

¹⁹ Olikituusa gha obutantoolaku maiso, ni nsobola kumira ku matanta?

²⁰ Bwemba nga nkoze ekibi, mba nkukozeeku kabi ki iwe alingiriza abantu? Lwaki nkufuukiire ekikuzitoogherera?

²¹ Kale lwaki tonsonigha kiisi kye nasobya kyonakyona, n'osasaagho ekibi kyange? Kuba mpegaano nja kufa nhingire eitaka, era olija okundhagala nga tikaaligho.”