Yobu 6 - Baibuli Ekibono kya Katonda 2014

Yobu yeemuluguunhia olw'okudaazibwadaazibwa kwe

¹ Agho Yobu yairamu ng'akoba ati:

² “Ngoli okweraliikira kwange kupimwa, era n'enaku yange n'eteebwa ku minzaani,

³ byandisinze omusenho ogw'enhandha obuzito. Kale bye ndhogeire bibaire bya kwanguuyiriza.

⁴ Kuba Katonda Aghanga Ebintu Byonabyona ankubye obusaale bwe bwanhingira mu mubiri, obusagwa bwabwo bwabuna omubiri gwange. Katonda aleese ebitiisa by'ali nabyo, yaabisimbya enhiriri okuntanulaku olutalo.

⁵ Endogoyi emeera ng'eri n'eisubi ly'erya? Oba, ente emoola ng'eri n'emere yaayo?

⁶ Ekintu ekiziramu nsa kiriika nga tikirungiirwamu muunhu? Oba, omuntu afunamu ki mu kulya ekintu ekitawooma?

⁷ Nzira mwoyo gwenda kulya bintu biri ng'oti n'ebyo, kuba bineenhinhasa okubirya.”

Yobu asaba Katonda amuzikirize

⁸ “Ngoli Katonda awulira kye nsaba, era n'ampa kye neegomba

⁹ Ngoli aganha okuuniantula, n'andhita!

¹⁰ Ekyo kyandindhizizaamu amaani, naasagamba, era neerabira n'obulumi obungi bwe ndimu; kuba tirobangaku Omutukuvu oyo by'alagira.

¹¹ Amaani gakaali gha, ge ndi nago okwongera okuba omulamu? Lwaki neeyongera okuba omulamu, nga nzira isuubi?

¹² Nze ndi mugumu ng'oti ibaale, oba omubiri gwange guli ng'oti gwakolebwa mu kyuma kya kikomo?

¹³ Mu butuufu tikaali na maani geeyamba, era tikaali na kye nsobola.”

Yobu yeemuluguunhiza bakagwa be

¹⁴ “Omuntu ali mu buzibu ng'oti ni buno bwe ndimu, agwaine okuyambibwa baine, ni bw'aba nga yeegaine Katonda oyo Aghanga Ebintu Byonabyona.

¹⁵ Aye bakagwa bange tibeesigika, bali ng'oti n'obwiga obubaamuuku amaadhi, ate ni gamala gakamiira.

¹⁶ Obwiga obwo bugema omuzira bwabbalanguka.

¹⁷ Aye bwekusuugha bukamiira era bwabulagho, olw'omusana okubwokya.

¹⁸ Abatambuze bava mu njira yaibwe, nga baagala amaadhi; baatambulatambula eyo batyo mu irungu, baazikirira.

¹⁹ Ababise ab'e Tema baagala obwiga obwo n'abatambuze ab'e Sheba baata eisubi mu bwiga obwo.

²⁰ Aye baswala, kuba baabwesigira bwereere bwe babutuukaku ni batabona maadhi, basoberwa baayasaamirira.

²¹ Mwena muli ng'oti n'obwiga obwo ye ndi, kuba mubona nga ndi mu kabi, mwatya butye.

²² Mbakobyeku nti, ‘Mumpe ekirabo?’ Oba nti, ‘Mutoole ku byaimwe mugheeyo enguzi ku lwange?’

²³ Oba nti, ‘Mumponie omuzigu?’ Oba nti, ‘Muununule mu ngalo edh'abo abaanhigiriza?’ ”

Yobu akakasa nga bw'aziraku musango

²⁴ “Ka nsirike munsomese, munkobere mmanhe kye nasobya.

²⁵ Ebibono ebituufu bimatiza omuntu. Aye ebyo bye muli kwogera bigasa ki?

²⁶ Mudhuuba muti musobola okungalagira mu bye nkobye, ate nga beene imwe muli kumbona ng'omuntu ali kwogera eby'obwereere, ebiri ng'oti mpewo?

²⁷ Imwe musobola n'okukubira ku bamulekwa akalulu olw'okubafunamu! Era musobola n'okukola ekintu kyonakyona ku bakagwa baimwe, olw'okubafunamu amagoba!

²⁸ Aye mpegaano muuningirire mu maiso kuba tiibaguye nga muuningiriire.

²⁹ Mbeeghembye mweireku mwerowooze mulobe kunsibaku kibi. Mweireku mpegaano, mulobe kunsalira musango kunsinga, kuba ensonga dhange ntuufu.

³⁰ Ghaligho ekikyamu kye ndhogeire? Mudhuuba muti tisobola kwawulagho kirungi na kibi?”