Yobu 5 - Baibuli Ekibono kya Katonda 2014

Elifazi anenia Yobu ati n'eyeereetera ebizibu mwene

¹ “Mpegaano yeta, obone oba nga ghaligho anaakuvugira. Onaakyukira ye malaika ki anaakubeera?

² Bwenebwene okweraliikirira kwita omusiru, n'ensaalwa eita azira magezi.

³ Nabona omusiru eyambonekera okuba obulungi, aye nze mu kiseera kyene ekyo, naakolimira ekifo mw'aba.

⁴ Abaana be baba mu kabi; emisango gyaibwe gisalirizibwa abalamuzi, ghaabula aboogererayo.

⁵ By'akungula biriibwa abo abali endhala, baatoolayo n'ebyo ebyakulira mu mawa; obukombe bwe bwegombebwa abo ababuguniriire.

⁶ Kuba okudaazibwadaazibwa tikumeruka kuva mu nkungu ng'oti nsigo, oba ebizibu okusibuka okuva mu itaka.

⁷ Aye abantu beene n'abaazaalirwa okuba n'ebizibu, ng'oti n'obusambuka bw'omuliro bwe busambukira ghaigulu nga buva ku muliro.”

Elifazi agha Yobu amagezi

⁸ “Ngoli mbaire nga ninze, nandyebuuziiza ku Katonda, era Katonda oyo ye nandyandhuliire ensonga dhange.

⁹ Oyo akola eby'amaani bye tutasobola kutegeera bukalamu, era n'ebyewuunhisa ebitabalika.

¹⁰ Agwisa amaadhi ku nsi, yaafukirira enimiro.

¹¹ Abo abeisa ghansi abasitula, era yaagumya abo abali mu maziga, yaabatuusa ku kusagamba.

¹² Alemesa entegeka edh'ab'olugezigezi, baalemwa okudhituukiriza.

¹³ Ategamu abagezi, ng'abita mu magezi gaibwe geene, era yaakomya mangu entegeka edh'abali n'enkwe.

¹⁴ Omusana baba bali mu nzikiiza, era baaghaamanta mu kasana ghagati oti bwire.

¹⁵ Aye Katonda awonia abaghafu okwitibwa; abali mu bwetaavu yaabawonia okutuntuzibwa ab'amaani.

¹⁶ Olwo abaavu baaba n'eisuubi, era abakozi ab'ebibi baabula eky'okwogera.

Yobu aliiramu okuba obulungi

¹⁷ Bona eno, wa nkabi omuntu Katonda y'agolola okuva mu nsobi. Kale otanhoomanga kukangaivulwa kw'Oyo Aghanga Ebintu Byonabyona.

¹⁸ Kuba aja yaakuba omuntu oluguma, aye yaamunhiga amabwa; akubisa engalo dhe omuntu, aye engalo dhe edho dhaamuwonia.

¹⁹ Aidha kukuwonianga mu bizibu byonabyona; buliidho tootuukibwengaku kabi koonakoona.

²⁰ Aidha kukuwonianga okufa ng'endhala egwire, era akukugirenga mu lutalo olobe kwitibwa.

²¹ Aidha kukuwonianga abakwogeraku eby'obuguya; toidha kutyanga kuzikirira, bwe kunaidhanga.

²² Endhala n'okuzikirira, biidha kubanga kintu kitono inho y'oli, era ensolo edh'omu nsiko toidhanga kudhitya;

²³ kuba mu nimiro yo timuubengamu mabaale, n'ensolo edh'omu nsiko tidhiikulumbenga.

²⁴ Oidha kubanga mugumu ng'oidhi oti mu ndhu yo oli miraala; era oidha kukeberanga mu byayo byo nga muziramu kibuze.

²⁵ Oidha kubanga n'abaidhukulu kamaala; eizaire lyo liidha kweyongeranga okwala ng'oti isubi ku nsi.

²⁶ Olifa waateebwa mu magombe ng'omaze okughangaala waawola, ng'oti n'engaano ye bakungwire mu biseera byayo ebituufu, n'ereetebwa ekubwe.

²⁷ Bona eno, ebyo ife twabyekebeedha, twabona nga bya mazima. Kale biwulire, obimanhe, ku lw'obulungi bwo.”