Yobu 42 - Baibuli Ekibono kya Katonda 2014

Yobu yeenenia

¹ Agho Yobu yairamu Musengwa Katonda ng'akoba ati:

² “Musengwa Katonda, ndidhi ng'oghanga ebintu byonabyona. Era ky'oba osazeegho okukola, ghazira kikiziyiza.

³ Obuuziiza oti, ‘Niiwe ani okutakania entegeka yange, ng'oyogera ebyoleka obutamanha?’ Bwenebwene ndhogeire ebintu bye ntategeera, ebinswikiriire era ebiinemye okumanha.

⁴ Onkobye oti, ‘Wulirisa ndhogere, nkubuuze ebibuuzo ondhiremu.’

⁵ Nawuliranga buwulire bye bakwogerangaku, aye mpegaano nkweboneireku n'agange.

⁶ Kale ni neemenhie era neenenia naatyama mu nkungu ni mu ivu.”

Katonda anenia bakagwa ba Yobu

⁷ Agho bwe yamala okwogera ni Yobu ebibono ebyo, yaakoba Elifazi Omutemani ati: “Nkusungughaliire inho iwe ni baino bombi, kuba timundhogeireeku bituufu ng'oti n'omugheereza wange Yobu bw'ayogeire.

⁸ Kale ni, mpegaano mutwale ente enume musanvu, n'entaama enume musanvu eri omugheereza wange Yobu, mugheeyo ku lwaimwe ekigheebwayo ekyokebwa. Omugheereza wange Yobu aidha kubasabira, era ndidha kuganha by'anaabasabira, ndobe kubakolaku ng'obusirusiru bwaimwe bwebubagwaniza. Kuba timundhogeireeku bituufu ng'oti n'omugheereza wange Yobu bw'ayogeire.”

⁹ Agho Elifazi Omutemani, ni Bilidadi Omushuhi, ni Zefari Omunaamathi, baaja, baakola nga Musengwa Katonda bwe yabalagira. Era Musengwa Katonda yaaganha okuwulira Yobu bye yabasabira.

Katonda airizaagho Yobu ebintu kamaala okusinga bye yafiirwa

¹⁰ Agho Yobu bwe yamala okusabira bakagwa be, Musengwa Katonda yaamwirizaagho obukombe bwe; nga bwe yali nabwo mu mainhama okubyamu emikuzi ebiri.

¹¹ Agho baganda ba Yobu ni baanhina, ni boonaboona abaali bamwidhi baidha, baaliira ghalala naye ekiiwulo mu nnaku ye. Era baamusaasira olw'ebizibu byonabyona Musengwa Katonda bye yamutuusaaku. Buli muntu yaamugha ekitundu kya feeza n'empeta eya zaabu.

¹² Musengwa Katonda yaagha Yobu enkabi mu kiseera eky'obulamu bwe eky'oluvainhuma, okusingaku ni mu kyasooka. Yobu yaaba n'entaama omutwalo mulala n'enkumi ina, n'engamiya kakaaga, n'ente edhirima lukumi, n'endogoyi enkazi lukumi.

¹³ Era yaazaala abaana abalenzi musanvu, n'abaghala basatu.

¹⁴ Omughala asooka yaamutuuma eriina Yemima, owokubiri Kezia, n'owokusatu Kereni Happuki.

¹⁵ Mu nsi yoonayoona nga ghazira bakazi baboneka bulungi ng'oti ni baghala ba Yobu. Era iseibwe yaabagha emigabo egy'obusika aghalala ni baanhinaibwe.

Okufa kwa Yobu

¹⁶ Ebyo bwe byawa, Yobu yaaghangaala emyaka kikumi n'ana, yaabona ni ku biidhukulu n'ebiidhukulu.

¹⁷ N'oluvainhuma Yobu yaafa nga musaadha mukaire, ow'emyaka emingi gyenegyene.