Yobu 41 - Baibuli Ekibono kya Katonda 2014

Engoina

¹ “Engoina osobola okugivubisa eirobo, oba okusiba olulimi lwayo n'omugugha?

² Osobola okwingiza omugugha mu nhindo yaayo, oba okuwumula oluba lwayo n'eirobo?

³ Enaakwegayirira ogireke eje? Enaayogera n'iwe bukalamu ogisaasire?

⁴ Enaakola n'iwe endagaano ebenga mugheereza wo enaku dhoonadhoona?

⁵ Onaazaanhanga nayo ng'oti bw'ozaanha n'enhonhi? Oba onaagisibiranga abagheereza bo abaguna ebasanhuse.

⁶ Abavubi banaagiramuzanga? Abasuubuzi banaagitematemanga okugitunda?

⁷ Osobola okugifumita eifumo lyabita mu luwu lwayo? Oba omutwe gwayo okugufumita n'amafumo agafumita ebyenhandha?

⁸ Geza ogisiinheku, toliirayo lundi kabiri. Era olutalo tolirwerabira.

⁹ Okugibona obubone, omuntu awaamu amaani, yaagwa ghansi ku itaka.

¹⁰ Ghazira muntu akana n'asiikuula ngoina. Kale naani aguma okwemerera ghe ndi?

¹¹ Naani eyasooka okumpa, ye nteekwa n'okwiriza? Kiisi ekiri ghansi gh'eigulu kyange.

Entiisa y'engoina

¹² Tiirobe kwogera ku magulu gaayo, ni ku maani gaayo, ni ku kikula kyayo ekikalamu.

¹³ Naani aghanga okugitoolamu ekivaalo kyayo eky'oku ngulu, oba okugifumita n'abita mu luwu lwayo olw'emibiri ebiri.

¹⁴ Naani asobola okwasamya omunwa gwayo? Amaino gaayo nga gagemya entiisa!

¹⁵ Ebigalagamba byayo ebigumu bigyewuliza. Bisibagaine byabbalanguka ng'oti ibaale.

¹⁶ Buli kirala kiyungibwa ku kiinaakyo, ghaaloba kusigalagho kaghagaanhia waire akatono omubita empewo.

¹⁷ Byegema ghalala byakalanguka, ghazira kisobola kubyawula.

¹⁸ Bw'eyasimula evaamu okumyansa. Amaiso gaayo gaamyuka oti n'endhuba eri kuvaayo.

¹⁹ Omunwa gwayo guvaamu omuliro ogwaka, gwavaamu n'obusambuka obw'omuliro.

²⁰ Enhindo yaayo evaamu omuuka, oguli ng'oti n'oguva ku ntamu eri kutogota.

²¹ Omuuka gw'egheera gukuma amanda, enimi edh'omuliro dhaava mu munwa gwayo.

²² Eri n'amaani mu nkoto etiisa buli agyagaana.

²³ Emamba yaayo yeegema ghalala yaagyeriipiraku, aghazira kuleberamu.

²⁴ Omwoyo gwayo tigutya, gwakula ng'oti ibaale; mubbalangafu ng'oti lubengo.

²⁵ Bw'ekola eti n'esituka, n'emisambwa gitya. Gyezinduka gyabula eky'okukola.

²⁶ Ghazira mpiima eghanga kugifumita, waire eifumo, oba eisinku, oba akasaale.

²⁷ Ekyuma ekigumu einho ekibona ng'oti isubi ikalu, ekyuma eky'ekikomo ekibona ng'oti muti gwa mpumbi.

²⁸ Tosobola kugibingisaagho kasaale. Amabaale ag'ensuumulo gaba ng'oti bikabakaba ku yo.

²⁹ Emiigo gy'entole gyona bikaba bukaba ku yo. Amafumo ge basuula okugifumita egasekerera busekerere.

³⁰ Ebigalagamba by'oku nda yaayo, biri ng'oti n'engyo edh'obwogi. Bwe yeeghaluliza mu bitosi, ghaba ng'oti ekintu kye bamulungulisa engaano n'ekibiseegho.

³¹ Bw'eingira enhandha esiikuula amaadhi, yaaba ng'oti n'entamu etogota, era ng'oti n'ensaka ey'omuzigo etogota.

³² Mu maadhi gh'ebise, erekamu okwesiikuula okweru, kyaba ng'oti entobo y'enhandha emeze envu.

³³ Ghazira kigifaanana ku nsi, yatondebwa ng'eziramu kutya.

³⁴ Enhoomerera buli nsolo eneepansipansi, yeene ni kyabazinga w'ensolo dhoonadhoona edh'omu nsiko.”