Yobu 40 - Baibuli Ekibono kya Katonda 2014

Katonda akoba Yobu amwiremu

¹ Musengwa Katonda yaakoba Yobu ati:

² “Onsonsooniiza wanvunaana, mpegaano obwo tondhiremu, onaasirika busirike?”

³ Agho Yobu yairamu Musengwa Katonda ati:

⁴ “Nze bwendi era bwendi, nnaakwiramu ntya? Ka ngeme bwa ku munwa, nsirike busirike.

⁵ Nayogeire ira emikuzi kamaala, tiidha kwiramu kwogera.”

⁶ Agho Musengwa Katonda, ng'ali mu kiwunga ow'amaani, yairamu Yobu ng'akoba ati:

⁷ “Kale ni fungiza, ondhiremu bye nkubuuza.

⁸ Onaatuuka n'okuntwala okuba ng'asaliriza? Onaasalira nze omusango okunsinga, iwe oyetebwe omutuufu?

⁹ Iwe oyaga ninze amaani? Era osobola okutyabuka n'amamiro agali ng'oti n'agange?

¹⁰ Kale ka mbone bw'ofuuka omukungu era omwekuluntaze, ofuuke omubbede ow'ekitiisa.

¹¹ Yolesa obusungu bwo obubitirivu, olingirire buli mwepansi omwise olusisi.

¹² Bwenebwene lingirira buli mwepansi omumale amaani. Otyankirire ababi agho gheene ghe bali.

¹³ Baziike boonaboona ghalala mu nkungu, basibire mu kifo ekigisiibwa.

¹⁴ Olwo zeena nnaakusaaka, nti obuyinza bwo n'obughangwire.

Envubu

¹⁵ Kale bona envubu ye natonda, ng'oti bwe natonda iwe: Erya isubi ng'oti nte,

¹⁶ aye amaani gaayo gagiri mu nkende ni mu miziisa egy'oku nda yaayo.

¹⁷ Ebbalangusa omukira gwesimba ng'oti muvule, emiziisa gy'amagulu gaayo gyasibagana.

¹⁸ Amagumba gaayo magumu ng'oti kyuma kya kikomo. Amagulu gaayo gali ng'oti mitayimbwa egy'ekyuma ekigumu einho.

¹⁹ Eyo n'ensolo esinga okwewuunhisa, mu nsolo dhoonadhoona. Omutonzi waayo yenka n'asobola okugiseetaku n'empiima.

²⁰ Aye ensozi okuzaanhirwa ensolo dhoonadhoona edh'omu nsiko, n'edhigigha by'erya.

²¹ Erambaala ghansi gh'obuti obw'amawa, yeegisa mu bitoogo mu bibali.

²² Yeigama mu binsense by'obuti obw'amawa, yaabwama mu myeta gy'amaadhi.

²³ Omwiga bwegusiikuuka, tetya. Amaadhi ga Yorudani ni bwe gaidhula okutuuka ku munwa gwayo, eguma omwoyo.

²⁴ Ghaligho asobola okugigema ng'eri kumoga? Oba aghanga okugigemya ku mutego, n'okugifumita enhindo?”