Yobu 4 - Baibuli Ekibono kya Katonda 2014

Olughayo olusooka 4:1—14:22 Elifazi anenia Yobu

¹ Agho Elifazi Omutemani yairamu Yobu ati:

² “Bwe nnaayogeraku kinaakubisa bubi? Aye tighanga kwefuga ni ntabaaku ni kye ndhogera.

³ Bona, oyegereisa abantu kamaala, era waagumya abanafu.

⁴ Ole bwe yeekontola omugemerera, yaaguma, yaaloba kugwa.

⁵ Aye buti bwe kituuse ku iwe, waawaamu obuguminkiriza era kikutenhiiza weeraliikirira.

⁶ Katonda wamusinzanga, waaba mwesigwa y'ali era waaba muntu mwesimbu. Ekyo tikikugha isuubi?”

Katonda tabonereza bantu batuufu

⁷ “Mpegaano sooka oidhukire: wawuliraku omuntu aziraku musango ng'asaaniziibwagho, oba omuntu omutuufu ng'azikiriziibwa?

⁸ Nze mboine ng'abantu abakola ebikolwa ebibi, bakungulamu bibi.

⁹ Katonda abafuuwa omuuka ogw'obusungu bwe oguli ng'oti kiwunga, yaabazikiriza.

¹⁰ Abantu ababi bawologoma ng'oti n'empologoma enkambwe, aye Katonda abasirisa era yaabamenha amaino.

¹¹ Bafa ng'oti n'empologoma edhizira kye dhiita kulya, n'abaana baibwe basansaana.”

Elifazi abonekerwa

¹² “Lwali lulala naafuna obukwenda kisiriikiriza, nga buli mu kaama inho, kumpi ndobe n'okubuwulira.

¹³ Nali mu kulogootana obwire, endoolo enhingi einho nga dhingemye.

¹⁴ Entiisa yangema era naatengera; amagumba gange gaasagala.

¹⁵ Empewo ey'omuzimu yanfuuwa mu maiso, enviiri dhampwa ku mutwe.

¹⁶ Naabona ekintu ekyemereire agho; naamoga inho, aye naaloba kukitegeera. Woonawoona nga ghaligho kasiriikiriro. Agho naawulira eiroboozi nga likoba liti,

¹⁷ ‘Omuntu alifa, asobola okuba omutuufu mu maiso ga Katonda? Oba, omuntu obuntu aghanga okuba omulongoofu mu maiso g'oyo Eyamutonda?

¹⁸ Oba nga Katonda tiyeesiga waire abo abamugheereza mu igulu, era ni bamalaika be boona abanenia olw'ensobi dhaibwe,

¹⁹ memale obwo waalowooza oti aneesiga abantu abakolebwa mu itaka, abali ng'oti nkungu era b'asobola n'okuniantula ng'oti bisiisa.

²⁰ Okuzikirira kwaibwe tikutwala na kiseera. Baba balamu okuva ku nkyo, aye buja okutuuka eigulo nga babuzeegho, baaloba na kwidhukirwa.

²¹ Bafa nga bakaali kuba na magezi; bye babaire nabyo byonabyona byatwalibwa abandi.’ ”