Yobu 39 - Baibuli Ekibono kya Katonda 2014

¹ “Oidhi ebiseera empongo edh'omu nsozi bye dhizaaliramu? Oba waali weekaliriisaaku empuuli bw'ezaala?

² Oidhi emyezi gye dhimala nga dhiri mughako? Era oidhi ekiseera kye dhizaaliramu,

³ nga dhikuba amakiryaivu dhaazaala abaana baadho?

⁴ Abaana baadho bafuna amaani baakulira kuliya mu nsiko, era baajiira irala baaloba kwira ghe dhiri.

⁵ Naani eyaleetera entulege okuba n'eidembe? Naani eyagirekula erumuke nga yeetaaya?

⁶ Ninze nagigha eirungu okuba amaka gaayo, naagireka okuba mu nsi ey'omuunhu.

⁷ Yeekuumira eyo ezira kwasiikana kwa mu bibuga. Era tewulirayo muvuzi agidhuuka, ng'agiragira kukola mirimo.

⁸ Eyagaaza mu nsozi omuli ebyayiro mw'eriira, era omwo mw'enooneza buli kimera ky'erya.

⁹ Embogo eganha okukukolera omulimo gwonagwona? Erisulaku aghali ekintu ensolo dho mwe dhiriira?

¹⁰ Osobola okugisibaku embago yaakulimira? Oba yaakughaluliza embago yaakukumulira enimiro?

¹¹ Onaagyesiga olw'amaani gaayo amangi, waagirekera omulimo gw'enaakukolera?

¹² Ogisuubira okukuleetera by'okungwire, yaabibunga mu kifo aghakubirwa emere ey'empeke?”

Maaya, embalaasi, n'enkookooma

¹³ “Maaya ekinia amaghagha gaayo ng'esagamba. Aye amaghagha gaayo ago n'amooya gaayo, oti gaba gali kwoleka kisa?

¹⁴ Kuba ereka amagi gaayo ku itaka, gasuuyizibwe omusenho.

¹⁵ Aye yeerabira eti ekigere kisobola okugamanhiangula, oba ensolo edh'omu nsiko okugatyankirira.

¹⁶ Ebisa bubi abaana baayo, ng'oti ti n'eyabazaala. Era tiyeefiirayo kubona nti tedaagira bwereere.

¹⁷ Kuba tyagitaamu magezi, era tyagigha kutegeera.

¹⁸ Aye bw'etoolera okulumuka, embalaasi n'omuvuzi waayo tebabonamu kantu.

¹⁹ Embalaasi niiwe ogigha amaani, n'enkoto yaayo niiwe ogireetera okuba engumu?

²⁰ Niiwe ogituumya ng'oti nzige, era n'eba n'okugufula okutiisa?

²¹ Esamba n'obukambwe mu kiiko; eziinhuuka ng'eja okulumba eby'okulwanisa eby'omuzigu.

²² Teidhi kyetebwa kutya era teira inhuma kuva mu lutalo.

²³ Ekiruutu omuli obusaale, n'eifumo einene erimesunkana, ghalala n'eifumo eitono, byonabyona birengeedhera era byakubaganira ku ndala eyo.

²⁴ Eziinhuuka embiro mu busungu obungi; tetereera ng'ewuliire okuvuga kw'endeka.

²⁵ Buli endeka lw'evuga, egufula eti, ‘Otyo.’ Olutalo n'okuleekaana kw'abaduumizi, ebiwunhiza ng'ekaali ghala.

²⁶ Niiwe oyegeresa ensega okweruupa, n'eyandhuluza amaghagha gaayo ng'eyolekeire oluuyi lw'omukono omusaadha olw'e buvandhuba?

²⁷ Niiwe olagira enkookooma okuniina n'ekola ekisu kyayo ghaigulu mu nsozi?

²⁸ Ezimba mu mpampagama edh'embaale engulumivu einho, yaaba eyo.

²⁹ Eyo y'eba okuleemesa ky'enaita erye, amaiso gaayo gakirengerera ghala.

³⁰ Abaana baayo banuuna omusaayi. Aghali ekifiire, yo gh'eba.”