Yobu 38 - Baibuli Ekibono kya Katonda 2014

Katonda airamu Yobu

¹ Agho Musengwa Katonda ng'ali mu kiwunga ow'amaani, yairamu Yobu ng'akoba ati:

² “Niiwe ani atakania entegeka yange, ng'oyogera ebibono ebyoleka obutamanha?

³ Kale ni fungiza ondhiremu bye nkubuuza.”

Ensi n'enhandha

⁴ “Wali oli luuyi gha bwe nataagho emisingi gy'ensi? Nkobera, oba nga otegeera inho.

⁵ Naani eyasalagho bw'enaayaga obunene? Oba naani eyagipima n'omugugha? Tokobye oti oli mumanhi?

⁶ Emisingi gyayo giri ku ki? Oba naani eyasimba eibaale lyayo ery'omu nsonda?

⁷ Nga buli kukya ku lunaku olwo, emuunienie edh'oku nkyo dhaayembera ghalala, n'ab'omu igulu baakuba emizira.

⁸ Oba naani eyaigaliza enhandha n'endhigi, ng'eghagwiza ng'oti n'ekintu ekiva mu nda ya inhaakyo?

⁹ Ninze nafuula ebire ekivaalo ky'enhandha, n'enzikiiza egemye naagifuula obugoye obugighemba.

¹⁰ Nagiteeragho ensalosalo kw'ekanga, naataagho endhigi edhigisiba.

¹¹ Naagikoba nti: ‘Kanga ghano, era otaswikangagho. N'okwesiikuula kwo okw'amaani kunaakomanga ghano.’”

Okukya kw'obwire, enzikiiza, n'amagombe

¹² “Bukyanga obaagho, waali olagiireku endhuba okuvaayo ku nkyo, oba okulagira obwire bukye?

¹³ Waali olagiireku obutangaavu okubuna buli kankondo ak'ensi, n'okubulagira bubingegho ababi mu bifo mwe beegisa?

¹⁴ Olwo ensi evaayo yaaboneka, ng'oti n'akamanhiso akateebwa ku kiwumbe eky'eitosi ng'eri ng'oti kivaalo ekya langi kamaala.

¹⁵ Ababi obutangaavu bubamalaku emiraala, bwabalobera okukola eby'obukambwe.

¹⁶ Waali otuuseeku ku ntobo y'enhandha aghali ensulo dh'enhandha? Waali otambuliireku ghansi eyo ku ntobo y'enhandha?

¹⁷ Ghaligho eyaali akwoleikeku emiryango gy'e magombe, egingira mu nzikiiza aghakuumirwa abaafa?

¹⁸ Waali otegeireku ensi bw'eyaga mu bwagaagavu? Ndhiraamu oba nga byonabyona obiidhi.

¹⁹ Oidhi engira etuuka aghasula obutangaavu, oba ekifo enzikiiza gh'eba?

²⁰ Osobola okubitwala mu kifo kyabyo? Era otegeera engira etuuka ye bisula?

²¹ Bwenebwene osobola, kuba wali muzaale mu kiseera ekyo! Nga mingi emyaka gy'oghangaire!

²² Waali oingiireku mu kifo ghe nkuumira omuzira n'amabaale ag'omugozi?

²³ Ebyo mbiterekera ekiseera ekizibu; olunaku olw'okulwana entalo.

²⁴ Oidhi engira etuuka endhuba gh'eva? Oba oidhi empewo ey'e buvandhuba gh'eva okusansaanira ku nsi?

²⁵ Naani eyatema ku igulu emyeta amaadhi mwe gabita okuyuyika, oba eyataagho engira ey'olukuba?

²⁶ Naani aleetera amaadhi okugwa mu biketezo ebitabaamu bantu, ni gagwa mu irungu omutaba muntu waire omulala?

²⁷ Naani afukirira ensi eyazika enkalu erekeibwa agho, n'esobola okumeramu eisubi eito?

²⁸ Amaadhi gali ni lata waago, oba naani azaala amatondo g'omusulo?

²⁹ Omugozi guva mu nda y'ani? N'omusulo ogutoonherera ng'oti luudhiidhi ni gugema, naani aguzaala?

³⁰ Amaadhi gafuuka mabbalangufu ng'oti ibaale, ni ku ngulu kw'enhandha kwagema.

³¹ Osobola okusiba emuunienie edheetebwa Puleyadesi mu kibbuututu? Oba okusimulula emigugha egiyimba aghalala emuunienie edheetebwa Orioni?

³² Osobola okufulumya emuunienie dhaaboneka mu biseera bya dho, oba okukuumira muunienie edho dhoonadhoona, entono n'enene, mu ngira yaadho?

³³ Oidhi ebiragiro ebifuga mu igulu? Osobola okubikozesa okufuga ni mu nsi?

³⁴ Osobola okuduumira ebire, byavaamu omwidhuzo gw'amaadhi, gaakumira?

³⁵ Osobola okweta ebimyanso by'olukuba biidhe obitume, byakukoba biti, ‘Tuli ghano?’

³⁶ Naani eyata mu bire amagezi ag'okugwisa amaadhi? Era naani eyagha olufu okutegeera ensambo ye lunaagwangamu?

³⁷ Naani asobola okukozesa amagezi n'abala ebire? Oba okubighendheka n'afuka amaadhi agabirimu,

³⁸ enkungu n'efuuka ebitosi, ebityanka ni byegema?”

Katonda abuuza Yobu ku nsolo n'enhonhi

³⁹ “Osobola okuyiigira empologoma by'erya? Oba okuliisa empologoma ento n'odhiigusa,

⁴⁰ nga dheegisiiza mu mpuku dhaadho, oba nga dhibwaime mu bisaka okuteega?

⁴¹ Naani aliisa amakoova bwe gatambulatambula eyo okwagala emere, ng'abaana baago bali kundirira?”