Yobu 37 - Baibuli Ekibono kya Katonda 2014

¹ “Kiwunga antengeza omwoyo gwampakukapakuka.

² Muwulire okutyabuka kw'amamiro ga Katonda, n'okuduma okuva mu kanwa mwe!

³ Asindika okumyansa ghansi gh'eigulu woonawoona, era kwabuna ensi yoonayoona.

⁴ Olwo amamiro ge gaawologoma, era gaatyabuka n'amaani. Gawulirwa, eno nga n'okumyansa bwe kuja mu maiso.

⁵ Okutyabuka kw'amamiro ga Katonda kwewuunhisa! Akola ebyewuninkiriza ebitulema okutegeera.

⁶ Kuba alagira omugozi ati, ‘Gwa ku nsi’ n'ekire eky'amaadhi ati, ‘Gwa n'amaani.’

⁷ Ayemereza emirimo gya buli muntu, abantu boonaboona be yatonda bamanhe by'akola.

⁸ Ensolo dhija ye dheegisa, dhaaba mu mpuku dhaadho.

⁹ Kiwunga ava ku luuyi olw'omukono omugooda olw'e buvandhuba, n'empewo eri benhogonhogo yaava ku luuyi olw'omukono omusaadha olw'e buvandhuba.

¹⁰ Katonda agheera omuuka gwaleeta omugozi, amaadhi gaagema ng'oti ibaale.

¹¹ Ekire ekigemu akiidhuza amaadhi, ebire byabunia woonawoona okumyansa kwe.

¹² Ebire byezungulula eno n'ere, nga bw'aba abiragiire. Bikolera ku biragiro bye buli ghantu ghe bija.

¹³ Agwisa amaadhi okufukirira ensi. Olundi agagwisa lwa kubonereza bantu, ate olundi kaaba kamanhiso akooleka ekisa kye.

¹⁴ Yobu, wulira kino: siriikirira olowooze ku byewuninkiriza Katonda by'akola.

¹⁵ Oidhi Katonda nga bw'alagira ebire, ni bivaaku okumyansa?

¹⁶ Oidhi ebire bwe biseeyeeya mu ibbanga, okwoleka obukugu bwa Katonda obutaloodheka?

¹⁷ Iwe adaagadaaga n'olwota mu bivaalo byo, ng'empewo ensu eva ku luuyi olw'omukono omusaadha olw'e buvandhuba, eri kufuuwa,

¹⁸ osobola okugemeraku Katonda okubamba eigulu, ni limesunkana ng'oti mbonerwamu?

¹⁹ Twegerese bye tube tukobe Katonda, ghazira kye twidhi naire. Tuli ng'oti n'abali mu nzikiiza.

²⁰ Nze tyenda kwogera naye, ghazira muntu eyaali yeeyendeireku Katonda amuzikirize.

²¹ Empewo bw'emala okweyaagho ebire, kiba kizibu okulinga mu butangaavu obumesunkana ku igulu.

²² Ku luuyi olw'omukono omugooda olw'e buvandhuba evaayo okumesunkana okuli ng'oti zaabu. Ekitiisa kya Katonda kituleetera okumutya!

²³ Okumanha nga Aghanga Ebintu Byonabyona wa bukumu inho, titusobola kuseeta gh'ali. Mutuufu, tasaliriza era azira muntu y'anhigiriza.

²⁴ Abantu kyebava bamutya, kuba tamalira biseera bye ku abo abeeyeta abagezi.”