Yobu 36 - Baibuli Ekibono kya Katonda 2014

Elihu akoba ati ayogera ku lwa Katonda

¹ Agho Elihu yaayongera, yaakoba ati:

² “Kola ng'okanguminkiriza mmale okukwinhonhola, kuba nkaaliyo ni kye nhenda okukoba ku lwa Katonda.

³ Ndidha kuleeta bye ndidhi okuva ghano ni ghale, okukakasa nti Omutonzi wange mutuufu.

⁴ Kuba tiguya mu bye ndhogera; nze y'oli kubona ndi n'okumanha okwidhuvu.

⁵ Bona eno, Katonda wa maani, ezira muntu y'alekulira agho, era ghazira ky'atategeera.

⁶ Taleka babi kusigalagho nga bakaali balamu. Era abanhigirizibwa abagha ekibagwaniire.

⁷ Abatuufu abakuuma; abatyamya ng'oti bakyabazinga, baagulumizibwa ebyanda n'ebyanda.

⁸ Aye bwe basibwa n'endhegere ni badaazibwadaazibwa,

⁹ Katonda abooleka nga bwe baakola ekibi olw'okwekuluntaza.

¹⁰ Aigula amatu gaibwe, bawulire by'abalabula, era yaabalagira okuva mu bibi byaibwe.

¹¹ Bwe bawulira ni bamugheereza, bamalaku obulamu bwaibwe nga bafunie ebirungi kamaala, era nga basangaavu.

¹² Aye bwe batawulira balizikirizibwa olumbe, baafa olw'obutamanha bwaibwe.

¹³ Abo abatatya Katonda basiba obusungu ku mwoyo. Bw'ababonereza tibamusaba kubayamba.

¹⁴ Bafa nga bakaali baisuka, baamalaku obulamu bwaibwe nga baswavu.

¹⁵ Aye Katonda ayegeresa abantu ng'abita mu kubadaazadaaza, era abaigula amaiso ng'abita mu nnaku ye baagaana.”

Elihu akoba ati Yobu agwaniire okubonerezebwa

¹⁶ “Katonda yakutoola aghazibu, yaakuta mu idembe, era waafuna eby'okulya waasinwa n'okusinwa.

¹⁷ Aye mpegaano oli kubonerezebwa nga bw'ogwaniire, omusango gukusinze.

¹⁸ Weegendereze olobe kuguyibwaguyibwa bya bukombe. Era enguzi erobe kukwonoona.

¹⁹ Okulira amaziga tikuukuyambe, waire amaani go goonagoona okukuwonia okudaazibwadaazibwa.

²⁰ Oteegomba bwire kwidha, amaghanga mwe gazikirizibwa.

²¹ Weegendereze olobe kukola bibi, kuba Katonda yakusindikira okudaazibwadaazibwa kukuwonie ebibi byo.”

Elihu akoba Yobu ati Katonda mukulu

²² “Bona eno, Katonda ni yenka agulumizibwa! Mwegeresa ki owundi ali ng'oti niye?

²³ Naani amukobera eky'okukola? Oba naani aghanga okumukoba ati, ‘Ky'akoze ti kituufu?’

²⁴ Ogwaine okumusaakanga olw'ebyo by'akola, abantu bye basaaka mu nhembo.

²⁵ Abantu boonaboona babibona, aye nga babirengerera ghala.

²⁶ Bona eno, Katonda mukulu era titumwidhi mu bwidhuvu, emyaka gye tigibalika.

²⁷ Atwala ghaigulu amatondo g'amaadhi, yaagafuulamu amaadhi agatoonha,

²⁸ ebire ge biyugha ni gatoonhera abantu mu bungi.

²⁹ Ghalighooku omuntu ategeera ebire bwe bighembebwa ku igulu, oba okutyabuka kw'eigulu Katonda y'aba?

³⁰ Bona, aidhuza okumyansa kw'olukuba ku igulu kwonakwona. Aye entobo y'enhandha yaagighembaku enzikiiza.

³¹ Aleetera amaadhi okugwa, yaaliisa abantu; yaabagha emere kamaala.

³² Agema olukuba mu ngalo dhe, yaalulagira okukuba gheenegheene gh'ayenda.

³³ Okutyabuka kw'olukuba kwoleka kuti kiwunga aseese, n'ente dhimanha dhiti ali kwidha.”