Yobu 35 - Baibuli Ekibono kya Katonda 2014

Omuntu by'akola ghazira kye bikola ku Katonda

¹ Agho Elihu yaakoba ati:

² “Yobu, iwe okibona nga kituufu okukoba oti oziraku musango mu maiso ga Katonda?

³ Oba okubuuza Katonda oti, ‘Ekibi kyange kikukolaku ki? N'obutakola kibi bungasiisa ki?’

⁴ Nze ndidha kukwiramu ni bakagwa bo.

⁵ Lingirira eigulu obone. Weekalirise ebire ebyeghaniike y'otatuuka.

⁶ Bw'oyonoona, Katonda omukolaku kabi ki? Ebibi byo bwe byeyongera obungi, bimukolaku ki?

⁷ Bw'oba omutuufu, Katonda aganhulwamu ki? Era ky'afunamu n'ekiri gha?

⁸ Obubi bwo busobola kulumya muntu buntu ng'oti niiwe, n'ebirungi by'okola muntu ye biganhula.

⁹ Olw'okutuntuzibwa okungi, abantu bakuba enduulu, baalira nga benda okufuna anaabawonia.

¹⁰ Aye ghazira akobaku ati, ‘Katonda ali luuyi gha eyantonda, asobozesa abantu okwemba ni bwe baba nga bali mu kiseera ekizibu;

¹¹ atwegeresa ni tuba nga tusinga ensolo, era atugha amagezi ni tuba nga tusinga enhonhi?’

¹² Abantu baba eyo baalira aye Katonda tabairamu, kuba beekuluntaza era babi.

¹³ Bwenebwene balirira bwereere, Katonda tabawulira naire, oyo Aghanga Ebintu Byonabyona talingaku ye bali.

¹⁴ Memale olwo iwe anaakuwulira atya, oli kukoba oti tomubona, era oti omusango gwo guli mu maiso ge, iwe omuteegereire buteegerere?

¹⁵ Era mpegaano oli kukoba oti obusungu bwe buzira ye bubonereza, era ghazira ky'afaayo ku bibi.

¹⁶ By'okoba biziramu nsa; by'oyogera tobiidhi.”