Yobu 34 - Baibuli Ekibono kya Katonda 2014

Elihu akoba ku bakagwa ba Yobu baawulegho eby'amagezi

¹ Agho Elihu yaakoba ati:

² “Muwulirise bye nkoba imwe abantu abagezigezi. Muntegere kutu imwe abaidhi ebintu;

³ kuba omuntu mu by'awulira, kutu we ayawulagho ebituufu n'ebitali bituufu, ng'oti n'olulimi lwe bwerwawulagho emere ewooma n'etawooma.

⁴ Ka twawulegho ekituufu. Twesaliregho beene na beene, kye tubona nga kikalamu.”

Elihu anenia Yobu okweyeta aziraku musango

⁵ “Kuba Yobu akobye ati, ‘Nziraku musango, aye Katonda tambisiisa mu butuufu.

⁶ Waire nga ndi mutuufu, ndhetebwa muguya, waire nga tiizangaku musango, nfumitibwa nfe bufe.’

⁷ Ezirayo muntu ali ng'oti ni Yobu, anhooma Katonda n'atamubona namu kantu.

⁸ Ajiira mu ikumbe ghalala n'abakozi b'ebyambyone, yaatambulira ghalala n'aboonooni;

⁹ kuba akobye ati, ‘Omuntu azira ky'afuna mu kuba mukagwa wa Katonda.’

¹⁰ Kale muntegere kutu imwe abantu abategeevu. Tikisoboka waire akatono Katonda okukola ebibi; oyo Aghanga Ebintu Byonabyona okukola ebikyamu.

¹¹ Kuba aja kugha kiisi muntu empeera ng'ajiira ku muntu oyo bye yakola. Alibisa kiisi muntu ng'ajiira ku muntu oyo bwe yeebisa.

¹² Bwenebwene Katonda takola kibi; oyo Aghanga Ebintu Byonabyona tasala musango mu butali butuufu.

¹³ Naani eyagha Katonda okulabirira ensi? Naani eyamugemya buli kintu?

¹⁴ Ngoli yasalagho okweiriza omwoyo gwe n'omuuka gwe, ebigha obulamu,

¹⁵ kiisi kiramu kyandizikiriire, abantu baira mu nkungu.”

Katonda ali n'obuyinza ku bantu

¹⁶ “Kale oba nga oli mugezi, wulirisa kye nkoba.

¹⁷ Bwenebwene ngoli Katonda takola bituufu, yandighanze okufuga? Osobola okusalira Katonda ow'amaani era omutuufu, omusango okumusinga?

¹⁸ Bakyabazinga n'abakungu bwe baba nga babi era abazira kye bagasa, Katonda oyo ti n'abasalira omusango okubasinga?

¹⁹ Katonda tiyeekubira ku luuyi lwa bafuzi, abisa bulala abakombe n'abaavu; kuba boonaboona bitonde bye.

²⁰ Abantu bafa mu kaseera buseera, mu bwire ghagati. Katonda abakuba baabulagho. Ab'amaani batoolebwagho nga ghazira na muntu abagemyeku.

²¹ Alingirira ensambo omuntu ye yeebisaamu, era abona buli kigere ky'asitula.

²² Ghazira kinsense waire nzikiiza egemye bedimudimu, abakola ebibi mwe baghanga okwegisa ku Katonda.

²³ Katonda tiyeetaaga kumala kulaalika muntu, aidhe mu maiso ge okumusalira omusango.

²⁴ Tiyeetaaga kumala kubuuliriza, memale akuukulegho ab'amaani era aizeegho abandi mu kifo kyaibwe.

²⁵ Nga bye yakola bw'abiidhi obukalamu, abakuukulagho bwire yaabazikiriza.

²⁶ Ababonereza olw'ebibi byaibwe ng'abantu babona;

²⁷ kuba baamuvaaku, baamudheemera, baalekera okufaayo ku biragiro bye.

²⁸ Baaleetera abaavu okumulirira. Yaawulira okulira kwaibwe nga babadaazadaaza.

²⁹ Katonda bw'asalagho obutabaaku ky'akolagho, naani asobola okumusalira omusango okumusinga? Bw'agisa amaiso ge, naani asobola okumubona, k'abe omuntu omulala ati oba eighanga eiramba?

³⁰ Katonda mwene n'alobera abantu abatamutya okufuga amaghanga n'okutuntuza abantu.”

Elihu akoba Yobu yeenenie

³¹ “Yobu, waali okobyeku Katonda oti, ‘Nayonoona, tikairayo kusobya?

³² Ndhegeresa kye ntabona bwemba nga nakola ekibi era tikairayo kukikola.’

³³ Oba nga otakania Katonda ky'akola, oghanga otya okumusuubira okukola ky'oyenda? Agho niiwe oli n'okusalagho, se ti ninze. Tukobere ky'olowooza.

³⁴ Abantu abategeevu baidha kunkoba, era kiisi muntu ow'amagezi awulira bye ndhogera, aidha kunkoba ati,

³⁵ ‘Yobu ayogeza butamanha, ni by'ayogera muzira magezi.’

³⁶ Yobu agwaine awozesebwe mu bwidhuvu buli kye yakola, kuba ayogera ng'oti n'abantu ababi.

³⁷ Ku bibi bye ayimbiraku n'obudheemu, yaanhooma Katonda nga tubona era yaamwogeraku ebibono ebitakutuka.”