Yobu 33 - Baibuli Ekibono kya Katonda 2014

Elihu akoba Yobu amuwulirise

¹ “Mpegaano ni Yobu, wulira bye nja okwogera; wulirisa ebibono byange byonabyona.

² Kale ka ntoolere okwogera, nfulumye ekindi ku mwoyo.

³ Ebibono byange byoleka nga ndi mwesimbu, era nga ndhogera mazima.

⁴ Omwoyo gwa Katonda n'ogwantonda, omuuka ogw'oyo Aghanga Ebintu Byonabyona n'ogwampa obulamu.

⁵ Oba osobola ndhiraamu. Sengeka bukalamu ensonga dho, oyemerere odhoogere.

⁶ Mu maiso ga Katonda, nze n'iwe tufaanana; twembi twawumbibwa mu itaka.

⁷ Kale otantya naire, tiidha kukubitiriraku.

⁸ Bwenebwene oyogeire nga mpulira, amamiro go gaavuga mu matu gange nga gakoba gati,

⁹ ‘Nziraku musango, ghazira kikyamu kye nakola. Nziraku kye nvunaanibwa era nziraku kibi.

¹⁰ Aye Katonda yeegemya ensonga edhiziramu, yambisa ng'oti muzigu we.

¹¹ Asiba ebigere byange n'endhegere, yaalingiriza bye nkola byonabyona.’

¹² Aye ka nkukobere iwe Yobu nti oli mukyamu bw'okoba otyo. Katonda tomugeza ku muntu, kuba amusinga ghala inho.

¹³ Ku lwaki omuvunaana olw'obutakwiramu by'okoba?

¹⁴ Ekituufu kiri nti Katonda ayogera mu nsambo eno oba ere, aye ng'abantu tibeeteerayo mwoyo ku ky'akoba.

¹⁵ Obwire abantu nga batendwike ku buliri mu ndoolo enhingi einho, baba ni bye babonera mu birooto ni mu kubonekerwa.

¹⁶ Agho Katonda gh'aigulira amatu g'abantu yaabaleetera okuwulira by'akoba, era yaalekagho akamanhiso akabalabula akatiisa.

¹⁷ Katonda ayogera asobole okutoola abantu mu bikolwa ebibi, era abawonie okwekuluntaza.

¹⁸ Abawonie okwika e magombe, n'okuzikirizibwa olumbe.

¹⁹ Katonda akangaivula omuntu ng'amusuula ku ndiri n'obulwaire, yaidhula obulumi mu mubiri.

²⁰ Obulamu bwe bwesinwa emere, n'ebyamuwoomeranga yaaba nga takaabyegomba.

²¹ Omubiri gumuwaaku yaagoogomba; amagumba ge agataabonekanga, gaakukunala.

²² Atuukira irala ku mugo gw'amagombe, yaabulaku katono okuzikirira.”

Elihu akoba ati Katonda aidha kuwonia Yobu

²³ “Aye ghasobola okubaagho owundi ku bamalaika ba Katonda enkumi n'enkumi, yaidha yaamuwonia; abo nga ni bamalaika abayamba abantu okubooleka ekituufu.

²⁴ Malaika oyo asobola okumugemerwa ekivunika, era yaakoba Katonda ati, ‘Muwonie alobe kwika magombe. Leka mmununule.

²⁵ Leka omubiri gwe gwire buyaaka ng'oti gwa mwana muto, airemu amaani ng'ag'omu buvubuka bwe.’

²⁶ Olwo omuntu yaasinza Katonda, era Katonda yaamugemerwa ekivunika, yaaja mu maiso ge nga musangaavu, kuba amuwoniiza okufa.

²⁷ Era yaakobera abantu ati, ‘Nayonoona, naakola ebikyamu, aye Katonda taneesasuliizaaku.

²⁸ Annunwire naaloba kwika magombe, ndidha kwongera okuba omulamu.’

²⁹ Bona, ebyo byonabyona Katonda abikolera abantu emikuzi kamaala,

³⁰ okubawonia amagombe, abaghe eisanhu ery'okuba abalamu.”

Elihu akoba ku Yobu ayege

³¹ “Mpegaano ni Yobu, wulirisa bye nkoba; sirika ondeke ndhogere.

³² Aye oba nga oli ni ky'okoba, kyogere mpulire. Yogera, kuba nhenda kukakasa nti oziraku musango.

³³ Aye oba nga okizira, sirika owulire bye nkoba. Ndidha kukwegeresa eby'amagezi.”