Yobu 32 - Baibuli Ekibono kya Katonda 2014

Olughayo lwa Elihu 32:1—37:24 Elihu yeena ayogera

¹ Agho abasaadha bale abasatu baalekera agho okwiramu Yobu, kuba yali yeekakasa ng'aziraku musango.

² Aye Elihu, mutabane wa Barakeli Omubuza, ow'oku lulyo lwa Ramu, yaasungughala inho kuba Yobu yeeyeta aziraku musango, yaanenia Katonda.

³ Era Elihu yaasungughalira ni bakagwa ba Yobu abasatu. Kuba baabulwa kye banairamu Yobu, waire nga baali bamaze okumusalira omusango okumusinga.

⁴ Elihu yali akaateeze bale bamale okwogera, memale abeeku ky'akoba Yobu. Kuba mwene n'eyali omuto ku bale.

⁵ Kale bwe yabona ng'abasaadha bale abasatu babuzeeku eky'okwiramu Yobu, yaasungughala inho.

⁶ Agho Elihu oyo mutabane wa Barakeli Omubuza, yairamu ng'akoba ati: “Nze ndi muto mu myaka aye imwe muli bakulu, kye nviire ni ntya, ni ntabakobera kye ndidhi.

⁷ Naakoba mule nti, ‘Ab'emyaka ka boogere, abakaire baghe amagezi.’

⁸ Aye omwoyo gwa Katonda oguli ku bantu, omuuka ogwo ogubateebwamu oyo Aghanga Ebintu Byonabyona, n'ogubagha okutegeera.

⁹ Okukula ti n'okugezighala, n'okukairigha ti n'okutegeera ekituufu.

¹⁰ Kyenva nkoba nti, ‘Muntegere kutu, zeena nkobe kye ndidhi.’

¹¹ Bona, mubaire nga mukeekoota bye munaayogera, nga nze nteegereire ebibono byaimwe, mpulire eby'amagezi ebibavaamu.

¹² Mbawuliriisa n'obwegendereza, aye ku imwe ghaabulagho waire omulala atakainia Yobu, oba n'airamu by'akobye.

¹³ Mwegendereze mulobe kwesuuta muti amagezi mugazwire: Katonda n'asobola okughangula Yobu, se ti bantu.

¹⁴ Yobu by'akobye tabyolekeiza nze. Era nze tyandimwizeemu na bibono ng'oti n'ebyo ebyaimwe.”

Elihu akoba ati bw'atayogera ayabika

¹⁵ “Yobu, bano basobeirwa, baabulwa eby'okwiramu. Bazira na kye bakaakoba.

¹⁶ Obwo nga bwebasiriike, nze nteegerere buteegerere? Beemereire agho, bazira na kya kwiramu kindi.

¹⁷ Nze ndidha kubaaku ni kye ndhiramu, ndidha kukoba kye ndidhi.

¹⁸ Kuba eby'okwogera ndi na kamaala. Mpulira mule ekimpika ndhogere.

¹⁹ Nziyiire, nziraku bugheereso. Bona, ndi ng'oti mwenge gwa mizabbibu omusu ogusandikiirwa, ogwenda okutulisa ekintu mwe bagutaire.

²⁰ Ndi n'okwogera nsobole okugheera. Nteekwa okubaaku kye nkoba.

²¹ Tiidha kwekubira ku luuyi lw'ono oba olw'ole. Tiidha kubaaku ye nsuutiriza.

²² Kuba tiidhi kusuutiriza, era Omutonzi wange asobola n'okuntoolagho amangu bwe nkola ntyo.”