Yobu 30 - Baibuli Ekibono kya Katonda 2014

Yobu akoba ati balata b'abo abamunhooma bazira mugaso

¹ “Aye mpegaano abantu be nsinga obukulu n'abaanhooma. Ate nga baiseibwe nze nabanhoomanga, nga tibaganha na kuba ghalala na mbwa dhikuuma byayo byange.

² Nandibafuniemu ki abantu abo abaali nga tibakaalimu maani?

³ Olw'obwavu n'endhala, baagugunanga ebikalukalu obwire mu nzikiiza mu irungu.

⁴ Baanoganga ku bisaka amakaba g'ebimera; emizi egy'akeeyoyeyo gyabanga emere yaibwe.

⁵ Baabingibwanga mu bantu, baabakubiriranga enduulu ng'oti baibi.

⁶ Baasigalira kubanga eyo mu nkonko dh'amaadhi, ni mu biina, ni mu mpuku edh'omu lubaale.

⁷ Baaliriranga mu nsiko ng'oti nsolo, baabanga ghansi mu bisaka nga beenhize ghalala.

⁸ Bali agho batyo basirusiru era tibamanhiibwa. Baakubwa emiigo, baabingibwa mu ighanga.

⁹ Aye mpegaano mbafuukiire lwembo, ndi nsambo yaibwe ya kudhondha.

¹⁰ Baneesiniirwa, tibakaaseeta ghe ndi, tibatya na kwidha kunfuudha mu maiso matanta.

¹¹ Olw'okuba Katonda ammaze amaani y'andekaagho atyo, kye benda okunkola kye bankola.

¹² Ekikuukuulu ky'abaisuka abo kiimingirira embiro; bali kutegeka okuunumba bantemule.

¹³ Bazingiiza engira yange baghange okunzikiriza, nga ghazira ababeereireku.

¹⁴ Bawomola ekituli mu kisenge kyange ekigumu, baidha okuunumba nga banziinduukiriza.

¹⁵ Ebintiisa bindidhira. Ekitiibwa kyange kijiire ng'oti mpewo. Eisuubi ery'okuwona kwange libise ng'oti kire.”

Yobu anenia Katonda olw'okumulumba

¹⁶ “Mpegaano mpoiremu obulamu; ekiseera eky'okudaazibwadaazibwa kwange kituuse.

¹⁷ Obwire amagumba gaanuma; obulumi bwe ndi nabwo tibusalaku.

¹⁸ Bungema n'amaani bwankunhakunha omubiri. Bwanhwegula enkoto yange yaaba ng'oti kitogi butogi eky'ekivaalo kyange.

¹⁹ Katonda ankubye mu bitosi, nfuuse ng'oti nkungu bukungu na ivu buvu.

²⁰ Wo Katonda wange, bwe nkulirira tondhiramu, bwe nkweghemba tonfaaku.

²¹ Onfuukire mukambwe, wankiriga n'amaani go goonagoona.

²² Oleka empewo yantwaliriza, wandhuuzayuuza eno n'ere mu kiwunga ow'amaani.

²³ Bwenebwene ndidhi nti oli kuntwala magombe, mu kifo erija abalamu boonaboona.

²⁴ Ku lwaki olumba omuntu ali kuzikirira, atakaali na ky'asobola kukola, okutoolaku okusaba okusaasirwa?

²⁵ Tyaliriranga maziga ghalala n'abali mu nnaku yaibwe? Tyalumirwanga bali mu bwetaavu?

²⁶ Aye bwe nasuubira ebirungi, ate bibi n'ebyaidha. Bwe nateegerera obutangaavu, ate nzikiiza n'eyaidha.

²⁷ Omwoyo gumpakukapakuka, tiguntereera; ekiseera ky'okudaazibwadaazibwa kintuuseeku.

²⁸ Ntambula nga ndi munakughavu, ghaabula ansaasiraku. Neesimba abantu ghe beesololeiza, naabeeghemba okuunhamba.

²⁹ Nafuuka muganda wa bibe, nsama busame oti byene; era naafuuka mukagwa wa maaya, nkyolya bukyolye.

³⁰ Omubiri gundhirugaire, era gundhokerera ng'oti muliro.

³¹ Mpegaano entongooli yange ngikubiraku nhembo dha kugegenga; endere yange ngifuuyira balizi.”