Yobu 3 - Baibuli Ekibono kya Katonda 2014

Yobu akolima olunaku lwe yazaalirwaku

¹ Ebyo bwe byawa, Yobu yaatoolera okwogera, yaakolima olunaku lwe yazaalirwaku.

² Yobu oyo yaakoba ati:

³ “Olunaku lwe nazaalirwaku luzikirire, era n'obwire obwakoba buti omukazi atoire enda ya mwana mulenzi.

⁴ Olunaku olwo lube lwa nzikiiza Katonda mu igulu alwerabire, n'endhuba erobe kulwakiraku.

⁵ Enzikiiza etiisa einho erutwale. Ekire kiruwembeku endhuba erobe kulwakaku, lwidhule okutya.

⁶ Obwire obwo maama bwe yatooleramu enda yange, bwidhule enzikiiza egemye bedimudimu. Butoolebwe mu nnaku edh'omwaka, bulobe kubalirwa mu myezi.

⁷ Bwenebwene obwire obwo, bulobe kwirayo kubaamu mukazi wundi abutooleramu nda bulobe kuwulirwamu muzira naire.

⁸ Obwire obwo bukolimirwe abo abakolimira enaku; abo abali n'obusobozi obw'okusiikuula Leviathani okukola kye benda.

⁹ Emuunienie edh'oku nkyo dhirobe kuboneka mu bwire obwo; obutangaavu bulobe kubaagho, n'endhuba erobe kuvaayo nga bukyeire.

¹⁰ Kuba obwire obwo bwaleka maama yaatoola enda yange, bwandeetera okudaagadaaga n'enaku nti.

¹¹ Lwaki tyafiiragho nga naakazaalibwa, ni ndhisa ogusembayo nga nva mu nda ya maama?

¹² Lwaki maama yandera ku mubiri? Lwaki yaanhonsa amabeere?

¹³ Kuba olwo nandifiire naasirika, era nanditendwike naawuumula,

¹⁴ ghalala ni bakyabazinga n'abafuzi abandi ab'oku nsi, abaazimbira obuyaaka ebisaagaati ebyabanga ebifulukwa.

¹⁵ Nanditendwike ghalala n'abalangira abaidhuzanga endhu dhaibwe zaabu ni feeza.

¹⁶ Nandibaire nga ntooleibwagho ng'oti n'ekintu ekiviire mu nda eviiremu obuve, oba naaziikibwa ng'oti n'omwana azaalibwa nga mufu, atabona ku ndhuba naire.

¹⁷ Eyo mu magombe, ababi balekera agho okutigomya abantu, era eyo, abaweekereiremu amaani ye bawuumulira.

¹⁸ Eyo abasibe bafuna obugheereso, baawona okudhuukibwa abo ababasalira amakatala.

¹⁹ Abantu ab'ebika n'ebika bali eyo, abamanhifu n'abatali bamanhifu, n'abairu nga tibakaafugibwa basengwa baibwe.

²⁰ Kigasa ki okuleka abantu abali mu nnaku, ni basigala nga bakaali balamu, n'okuleka abo abadaazibwadaazibwa okuba mu butangaavu?

²¹ Abantu abo beegomba okufa, aye okufa kwabeesamba; era banoonia okufa okusingaku n'ole ayagaaza ng'anoonia obukombe obwakwekebwa.

²² Basangaala inho era baasagamba, bwe bafa ni bateebwa mu magombe.

²³ Lwaki Katonda agha abantu obulamu ng'ate ebiseera byaibwe eby'omu maiso bikwekeibwa, era lwaki abataaku olukomera?

²⁴ Nze okulira n'okwafuuka emere yange, era okuwowoola okwange tikukoma.

²⁵ Ebintu bye ntya n'ebindidhira, era ebyo ebintiisa einho n'ebingwira.

²⁶ Nzira miraala waire obugheereso, bizibu byonka n'ebyesomba.”