Yobu 29 - Baibuli Ekibono kya Katonda 2014

Yobu aidhukira ebiseera bye ebikalamu ebyabita

¹ Agho Yobu yaayongera okwogera ng'akoba ati:

² “Ngoli mba nga bwenabanga eira. Ni mba mu biseera bire mwe nalabirirwanga Katonda,

³ entaala ye yayakiranga agho ku mutwe gwange, okuumulisa mbite mu nzikiiza.

⁴ Mu biseera ebyo nabanga bukalamu, nga Katonda ni mukagwa wange, akuuma amaka gange.

⁵ Olwo oyo Aghanga Ebintu Byonabyona ng'aba ghalala ninze, nga n'abaana bange baneezungulwire.

⁶ Ng'amata ge ndi nago nganaabya bwa bigere, olw'obungi. Nga n'olubaale ludhuluudha omuzigo gwe baakamulirangaku, mu bibala eby'emiti gyange emyoliva.

⁷ Bwe najanga mu kifo eky'olwekobaano ku mulyango ogwingira mu kibuga, nga nja mu kifo ekyange

⁸ abaisuka olwambonanga banviirayo, n'abakaire basituka baayemerera.

⁹ Abakulembeze baasirikanga, baagema ni ku minwa.

¹⁰ N'abakungu enimi dhaabeesibiranga ku bibuno!”

Yobu aidhukira bwe yayambanga abatuntuzibwa

¹¹ “Abaawuliranga bye ndhogera n'abambonanga, nga baneesiimisa era nga bandhogeraku bikalamu byereere;

¹² kuba nawonianga omwavu eyandiriranga okumuyamba n'oyo eyafiirwaku ise, azira amugema ku mukono.

¹³ Be nawonianga okufa bansabiranga nkabi. Banamwandu bye nabakoleranga byabasangaazanga inho, baakuba emizira.

¹⁴ Buliidho nakolanga bituufu byereere. Okukola amazima kwanfuukira ng'oti n'ekivaalo kyange, era ng'oti n'ekitambaala eky'oku mutwe.

¹⁵ Nagemanga abatulu ku mukono; naakongoodhianga abalema.

¹⁶ Nafuuka ise w'abaavu, neekalirisanga ensonga dh'abantu be ntaidhi.

¹⁷ Namenhanga emba dh'aboonooni, naabanhunhunkuza omuyiigo ogwababanga mu maino.”

Yobu aidhukira abantu bwe baamwisangamu ekitiibwa

¹⁸ “Nadhuubanga nti ndighangaala inho, naafiira mu maka gange nga ndi bukalamu.

¹⁹ Nali ng'oti muti ogulandiza emizi aghali amaadhi, nga n'omusulo gugwa ku nsaga dhaagwo obwire bwonabwona.

²⁰ Abantu bandhisangamu ekitiisa buliidho, n'amaani gange gaalobanga kukendeera.

²¹ Baateegereranga n'obuguminkiriza, baawuliranga bukalamu bye mbalamba.

²² Bye nayogeranga bwe byawanga, nga ghazira kye bongeraku. Ebibono byange byabanogananga ng'oti n'eitondo ery'amaadhi erigwa ku itaka eikalu.

²³ Banteegereranga ng'oti n'abateegerera amaadhi okugwa, baaba ng'oti n'abalimi bwe basangaalira ekire ky'amaadhi amatoigo.

²⁴ Be nasekerangaku nga tibasobola kukiikiriza bati kya bwene! Akamwenhu kange ku maiso kaabaizangamu amaani.

²⁵ Nabanga mubbede mu bo, naabasalirangagho eky'okukola. Nababangamu ng'oti ni kyabazinga mu igye lye; era ng'oti n'omuntu ali kugumya abafiiriirwa.”