Yobu 28 - Baibuli Ekibono kya Katonda 2014

Ekifo omusimibwa eby'omughendo

¹ “Bwenebwene eriyo ekirombe omusimibwa feeza, yaabaayo n'ekifo ye bakenenulira zaabu.

² Mu itaka, mwe basima ekyuma ekigumu einho. Era basaanuusa mabaale okufunamu ekyuma eky'ekikomo.

³ Abantu babinga enzikiiza nga bakunaania entaala, baayagala eyo mu itaka ghansi, amabaale ge banaasimayo eyo mu nzikiiza egemye bedimudimu.

⁴ Bayiikuula eitaka eyo eghala etaba bantu n'abatambuze ye batabita, nga beegemye ku migugha kwe beewuubira okwika, nga bali eyo bonka ku lwaibwe.

⁵ Emere erimwa ku nsi. Aye ghansi gh'ensi eyo, ebintu byetabula ng'oti n'aghali omuliro.

⁶ Mu mabaale gaayo mwe batoola amabaale ga bbululu ag'omughendo ageetebwa saffiro, mu nkungu yaayo mubaamu zaabu.

⁷ Engira ey'omu birombe ghazira nhonhi eyiiga egiidhi, n'akakubi tikagibonangaku.

⁸ Empologoma tegisimbangamuuku, oba ensolo eyindi yoonayoona enkambwe okugibitamu.

⁹ Abantu basima mu lubaale olubbalangufu, baasima mu nsozi okutuuka ku ntobo dhaadho.

¹⁰ Batema emyole mu lubaale, baazuula amabaale ag'omughendo.

¹¹ Bakugira emiiga girobe kukuuluula, baata gheeru ebintu ebyagisibwa.

¹² Aye amagezi gaagaanibwa gha? Luuyi gha aghaba okutegeera?

¹³ Tigaagaanibwa mu nsi ya balamu, ghazira aidhi mughendo gugalimu.

¹⁴ Entobo y'enhandha ekoba eti, ‘Tigali mu nze.’ N'enhandha yaakoba eti, ‘Tigali ghe ndi.’

¹⁵ Toghaayo zaabu n'ogafuna era topima feeza n'ogagula.

¹⁶ Zaabu omulungi ow'e Ofiri tayagayaga nago mughendo, waire amabaale ag'omughendo ageetebwa onikisi ni saffiro.

¹⁷ Zaabu n'ekirawuli tibisobola kwaga nago mughendo, waire ebyamadholobera ebyakolebwa mu zaabu omukenenule.

¹⁸ Amagezi ga mughendo inho okusinga amabaale ag'omughendo ageetebwa korali oba kurisitalo.

¹⁹ Eibaale ery'omughendo eryetebwa topazi ni zaabu omukenenule, tobigerangerania ku mughendo gwa magezi.

²⁰ Kale amagezi gava gha? Luuyi gha aghaba okutegeera?

²¹ Ebiramu byonabyona tibisobola kugabona, n'enhonhi edh'omu ibbanga dhoona tidhighanga kugabona.

²² Amagombe n'ekifo eky'okuzikirira bikoba biti, ‘Twewuliriraku n'agaife bye boogera ku magezi ago mu lubono bubono.’ ”

Katonda yenka n'aidhi aghali amagezi

²³ “Katonda yenka n'aidhi aghaba amagezi; n'ategeera engira etuukayo.

²⁴ Kuba n'atuusa amaiso mu buli kankondo ka nsi, n'abona buli kantu akali ghansi gh'eigulu.

²⁵ Yagha empewo amaani, yaapimira amaadhi ghe gakanga.

²⁶ Yagha amaadhi ghe gagwa, yaagha n'olukuba engira ye lubitamu.

²⁷ Olwo yaabona amagezi, yaageekalirisa, yaageekebeedha era yaagalingirira.

²⁸ Yaakoba abantu ati, ‘Bona, mu kutya Musengwa Katonda n'omuli amagezi; mu kwesamba ekibi, n'omuva okutegeera.’ ”