Yobu 27 - Baibuli Ekibono kya Katonda 2014

Yobu airamu bakagwa be

¹ Agho Yobu yairamu okwogera olughayo lwe, ng'akoba ati:

² “Katonda tambisiisa mu butuufu, era oyo Aghanga Ebintu Byonabyona andeeteire enaku ku mwoyo. Aye era ndi kumulayirira nti:

³ nga nkaali mulamu era nga nkaagheera omuuka Katonda mwene oyo gwe yampa,

⁴ omunwa gwange tigulikoba bya buguya, oba olulimi lwange okwogera eby'obulimba.

⁵ Tirigeza naire kukoba imwe nti muli batuufu; ndidha kwekalangulanga ku kubakoba nti nziraku musango, okutuusa lwe ndifa.

⁶ Ndidha kugumira ku kuba omutuufu; omwoyo gwange guzira kye gunvunaana obulamu bwange bwonabwona.

Abatakania Yobu babonerezebwe

⁷ Omuzigu wange abonerezebwe ng'omubi; n'oyo anwanisa akolweku ng'omwonooni.

⁸ Atatya Katonda kiki ky'asuubirayo, nga Katonda amukomiiza yaamutoolaku obulamu?

⁹ Bw'aliba mu buzibu, Katonda aliwulira okulira kwe?

¹⁰ Ti n'omuntu asanhukira einho okusinza oyo Aghanga Ebintu Byonabyona, n'okumweghemba ekiseera kyonakyona.

Katonda abonereza ababi

¹¹ Ka mbeegerese imwe, nti Katonda wa bukumu, tiidha kubagisa bifa ku oyo Aghanga Ebintu Byonabyona.

¹² Aye bona, imwe beene mwena mubyeboneireku n'agaimwe. Kale ku lwaki mweyogeza ebiziramu makulu?

[Zofari]

¹³ Kino n'ekibonerezo Katonda ky'agha ababi abakiriga bantu banaibwe:

¹⁴ Abaana be bazaala ni baala, baba ba kufa mpiima; eizaire lyaibwe tirifuna mere ya kulya erimala.

¹⁵ Ababi abo bwe bafa, abaana be balekagho bafa lumbe lubi, banamwandu baibwe baaloba na kubalira.

¹⁶ Omubi ni bw'alyesololeza empiiya edhitabalika, n'abunga ebivaalo ebisinga ni ku bye yeetaaga,

¹⁷ ebyo by'aba abunze omulungi n'alibivaala, era ole aziraku musango n'aligabana empiiya edho.

¹⁸ Endhu omubi y'azimba eba ng'oti kisu kya nhonhi, oba ng'oti n'entindi ey'omukuumi w'enimiro eba ey'akaseera obuseera.

¹⁹ Aja okutenduka nga mukombe, aye yaaloba kwirayo kuba mukombe kabiri. Aja okuzibula amaiso ati, ng'obukombe bwe bubuzeegho.

²⁰ Ebitiisa bimugwira mangu ng'oti mwidhuzo gwa maadhi ogazindula obuzindule, era obwire kiwunga yaamutwaliriza.

²¹ Empewo eva e buvandhuba emubbeeda yaaja naye, yaamweyaagho gh'aba.

²² Emufuumuula aghazira kusaasira, eno nga mwene bw'afuba okugyeteekuluzaaku.

²³ Eja ng'ewolomya ebintu byamuwowoiganira.”