Yobu 26 - Baibuli Ekibono kya Katonda 2014

Yobu akiina Bilidadi

¹ Agho Yobu yairamu ng'akoba ati:

² “Kale ng'onhambye nze omunafu ali ati, bwenebwene onumuukiriire!

³ Kale ng'ompaire amagezi nze azira ky'aidhi, era waayoleka by'otegeera obukalamu!

⁴ Naani akuyambyeku okwogera obukalamu otyo? Naani akughaire by'oyogeire?”

Bilidadi ayongera okwogera

⁵ “Abafu batengera nga batiire, eyo e magombe mu maadhi agali ghansi.

⁶ E magombe ezira kikwekeibwa ku Katonda; abona byonabyona ebiri mu kifo ekyo eky'okuzikirira.

⁷ Abamba eigulu ku luuyi olw'omukono omugooda olw'e buvandhuba, era yaalengeedhia ensi mu ibbanga.

⁸ Asibira amaadhi mu bire ebigemu, obuzito bwago bwaloba kubyabya.

⁹ Agisa entebe ye ng'agighembaku ebire.

¹⁰ Yataagho olukoloboze okwezunguluza enhandha, okwawula obutangaavu ku nzikiiza.

¹¹ Empagi dh'eigulu dhitengera era dhaadhugumira, Katonda bw'atiisaamu obutiise okudhisaaniagho.

¹² Olw'obuyinza bwe yaghangula enhanda; olw'amagezi ge yaazikiriza Rahabu ogusota gwamu.

¹³ Yafuuwa ebire yaabyeya ku igulu; yaagema empiima yaafumita ogusota ogw'omu nhandha nga guli kulumuka okwewonia.

¹⁴ Aye ebyo katundu butundu ak'ebintu by'akola. Era bye tumuwuliraku n'ebitono einho. Obukumu bwe obw'amaani bw'ali nabwo naani asobola okubutegeera?”