Yobu 24 - Baibuli Ekibono kya Katonda 2014

Yobu akoba ati Katonda tafaayo ku babi abakiriga abaavu

¹ “Ku lwaki oyo Aghanga Ebintu Byonabyona tataagho biseera bya kusaliramu musango? Ku lwaki abagheereza be tibabona bw'asala musango mu butuufu?

² Ghaligho abaiba eitaka lya banaibwe, baalyetwalira, baanhaga ensolo, baadhaaya ng'edhaibwe.

³ Batwala endogoyi ya walekwa, baatoola ente ku namwandu ye baawola eibandha, baagisigaza ng'omusingo.

⁴ Babinga abaavu babaviire mu ngira, baaghaliriza abaghafu okulumukagho n'okwegisa.

⁵ Olwo abaavu baaba ng'oti ntulege, baaba eyo mu irungu nga baagala akamere, ak'okugha abaana baibwe balye.

⁶ Era Baayagala eby'okuliisa ensolo dhaibwe, mu nimiro edhitali dhaibwe. Baanoga ku mizabbibu egirekeibwa mu nimiro dh'aboonooni.

⁷ Abaavu basula madu, nga ghazira kye beebwise okuwona empewo okubafuuwa.

⁸ Amaadhi gagwa gaababoleza mu nsozi, beegema ku lubaale olw'okubulwa ghe bageigama.

⁹ Ghaligho abantu ababi abaswankula abaana abaziraku baiseibwe, baabatoola ku bainhaibwe, baatwala abaana abo ab'abaavu ng'omusingo gw'eibandha.

¹⁰ Aye abaavu babita madu nga bazira kye bavaire. Endhala ebaluma nga beetwise emere y'empeke ye bakunguliire ababi.

¹¹ Baakamulira ababi abo omuzigo ogw'ebibala eby'emiti emyoliva, era baabakunhira omwenge ogw'emizabbibu, aye beene baasigala nga bali ndiwo.

¹² Abantu abali kufa basinda mu kibuga, n'abafumitiibwa baalira, aye Katonda yaaloba kufaayo ku bisobyo bikolebwa.”

Emisango ababi gye baiza mu nzikiiza

¹³ “Ghaligho abakyagha obutangaavu, nga tibakaabwenda era tibatambulira mu ngira muli butangaavu obwo.

¹⁴ Omutemo azuuka mu nzikiiza, yaita omwavu n'omughafu, era obwire aba mwibi.

¹⁵ Omusaadha omwenzi yeena ateega bwire kuziba, ng'akoba ati, ‘Ghazira aidha kumbona.’ Era yeefuusafuusa mu maiso, abantu balobe kumumanha.

¹⁶ Mu bwire abaibi mwe basimira ebituli mu ndhu, omusana beigaliza baaloba kubona butangaavu.

¹⁷ Batya ng'obwire bukyeire, aye ebiba mu nzikiiza tibibatiisa.”

Katonda alibonereza ababi [Zofari]

¹⁸ “Omubi amaadhi ag'omwidhuzo gamweyaagho, n'ekibandha kye kyakolimirwa Katonda, era tighakaaligho akola mu mizabbibu gye.

¹⁹ Ng'akasana ak'endoboozi bwe kamalagho omugozi ogusaanuuse, n'amagombe gatyo bwe gamalagho omwonooni.

²⁰ Ni inhina ow'omwonooni oyo mwene amwerabira. Enhengere dhaamweriira yaazikirira ng'omuti ogukuukwikegho.

²¹ Omwonooni abisa bubi omugumba, era ni namwandu tamukolera kalungi naire.

²² Aye Katonda mu buyinza bwe azikiriza ab'amaani; asituka yaabamalaku eisuubi ery'okuba abalamu.

²³ Aja yaabagha emiraala baatoolera okwesigula, aye yaasigala ng'abasimbyeku amaiso.

²⁴ Ababi babaaku bukalamu kumala bwa ntangama, oluvainhuma baabulagho. Batoolebwagho ng'abandi boonaboona; baaba ng'oti n'ebifaaganda eby'engaano ebisaliibwa ku kikolo.

²⁵ Oba nga ti bwekiri, naani anaanumiriza ati ndi muguya, era n'ayoleka ati bye ndhogera muzira nsa?”