Yobu 23 - Baibuli Ekibono kya Katonda 2014

Yobu ayagala Katonda aye Katonda yaamubula

¹ Agho Yobu yairamu ng'akoba ati:

² “Olwaleero era ndi kwemuluguunhiza Katonda bubi inho; tisobola kulekera kusinda olw'obulumi.

³ Ngoli mmanha ye nsobola okwagaana Katonda, ni ntuuka aghali ekityamo kye,

⁴ nandisengeike ensonga dhange mu maiso ge, naaloba kulekayo waire endala.

⁵ Nandimanhie by'andhiramu; naategeera by'ankoba.

⁶ Obwo, bwenebwene yandiinumiriiza n'obuyinza bwe mu bukulu bwe obwo? Busa, yandiwuliriisa bye nkoba.

⁷ Eyo omuntu omwesimbu asobola okuwoza naye, era omulamuzi wange oyo yandineedheereiza omusango, byawa.”

Yobu ayagala Katonda buli ghantu

⁸ “Bona, ndhagaire e buvandhuba, aye Katonda azirayo; n'e bugwandhuba yoona timuboineeyo.

⁹ Era naayagala ku luuyi olw'omukono omugooda olw'e buvandhuba, ni ku lw'omukono omusaadha olw'e buvandhuba, aye era timuboine.

¹⁰ Aye mwene aidhi engira ye ngema. Bw'alimala okundeba, alindhagaana nga ndi mutukuvu ng'oti ni zaabu omukenenule.

¹¹ Ntambulira mu ngira y'abitamu, era tigivaamu kudaaliima.

¹² Nkola by'andagira; naajiira ku by'ayenda, se ti ebyo nze bye neegomba.”

Katonda aidha kutuukiriza by'ategekeire Yobu

¹³ “Aye Katonda takyuka era ghazira asobola kumukyusa, oba okumutakania alobe kukola ky'ayenda.

¹⁴ Aidha kutuukiriza ekyo ky'antegekeire, era ali n'ebindi kamaala ebiri ng'oti n'ekyo by'ategeike.

¹⁵ Kyenva ni ntengera nga ndi gh'ali era ni ntya nga mmulowooziiza.

¹⁶ Katonda ammazeemu omwoyo; oyo Aghanga Ebintu Byonabyona andhugumiiza.

¹⁷ Katonda mwene n'antiisa se ti nzikiiza, waire ng'enzikiiza n'engemye ku maiso.”