Yobu 21 - Baibuli Ekibono kya Katonda 2014

Yobu akoba ati ababi basigala nga bali bukalamu

¹ Agho Yobu yairamu ng'akoba ati:

² “Muwulirise bukalamu bye nkoba; okwo n'okungumya kwe mbasaba munkolere.

³ Munganhe ndhogere, bwe nnaamala munaayongera okunsekerera.

⁴ Nze ku lwange tiri kwemuluguunhiza bantu. Kale ku lwaki nteekwa okuba omuguminkiriza?

⁵ Muuningirire, mwewuunhie, era mugeme ni ku minwa!

⁶ Bwe ndhuuba ku kyantuukaku, neezinduka, naatengera n'okutengera.

⁷ Ku lwaki abakola ebibi baghangaala ni bakairigha, nga bali n'obuyinza n'amaani?

⁸ Bafuna abaana n'abaidhukulu, era baabaagho, baabona nga boonaboona bakula.

⁹ Amaka gaibwe tigaba na bigatiisa, ni Katonda tababonereza naire.

¹⁰ Ebisolo byaibwe bighaka, era byazaala bukalamu.

¹¹ Abaana baibwe baligita embiro, nga bali kuzaanha oti butaama buto.

¹² Bembera ku bugoma ni ku ntongooli, baawoomerwa okuvuga kw'endere.

¹³ Bafuna ebirungi mu bulamu, era baafiira mu miraala.

¹⁴ Bakoba Katonda bati, ‘Tuveeku! Titwenda kumanha by'oyenda tukole.

¹⁵ Katonda Aghanga Ebintu Byonabyona ni ki einho, memale obwo tumugheereze? Tuganhulwamu ki mu kumusaba?’

¹⁶ Bakoba mbu baghangaala lwa maani gaibwe. Aye nze amagezi g'ababi tigaikiririzaamu.”

Yobu akoba ati ababi tibabonerezebwa

¹⁷ “Entaala ey'ababi yaali ezikiziibwaku? Akabi kaali kabatuuseeku? Era Katonda yaali ababonereizaaku mu busungu:

¹⁸ ni baba ng'oti bikaba ebifuuyibwa empewo, oba enkungu etwalibwa kiwunga?

¹⁹ Imwe mukoba muti, ‘Katonda abonereza abaana olw'ebibi bya baiseibwe.’ Aye leka Katonda abonereze abo beene, baghange okumanha nti babonerezeibwa lwa bibi byaibwe ebyo.

²⁰ Ababi abo ka babone beene nga bwe bazikirizibwa, bawulire obusungu bw'oyo Aghanga Ebintu Byonabyona.

²¹ Kuba bwe bamala okufa baba bakaafaayo ki ku bituuka ku b'omu maka gaibwe?

²² Basobola kwegeresa ki Katonda, oyo asalira omusango n'abo abali mu bifo ebya ghaigulu?

²³ Ghaligho abafiira mu maani ghagati nga bali bukalamu:

²⁴ emibiri gyaibwe nga migimu era nga minhirivu.

²⁵ Abandi baafa n'ekikansu ku mwoyo, nga tibabangaku basangaavu naire.

²⁶ Aye boonaboona baba bafiire, enhengere dhaabaidhula.”

Ababi baba bukalamu mu bulamu bwaibwe

²⁷ “Bona, ebidhuubo byaimwe mbiidhi era n'akabi ke mweteesa okunkolaku.

²⁸ Kuba mubuuza muti, ‘Endhu y'omukungu eri luuyi gha? Amaka ag'eyakolanga ebibi gali luuyi gha?’

²⁹ Timwogerangaku na batambula ngendo? Timuwulirangaku mawulire ge baira nago?

³⁰ Ku lunaku Katonda lw'asungughala n'abonereza, omubi buliidho n'awonagho.

³¹ Ghazira yeesimba mu maiso ge kumulumiriza musango gw'aiziiza, oba kumwesasuulizaaku olw'ebyo by'akoze.

³² Bw'atwalibwa okuziikibwa, amagombe ge bagakuuma bukalamu.

³³ Olukunkumuli lw'abantu lumugherekera nga baja okumuziika: abandi bakulemberamu ate abandi baavaaku einhuma, era bamuyughaku eitaka bukalamu kawola.

³⁴ Kale imwe munangumya mutya n'ebibono ebiziramu makulu? Bye muli kundhiramu byonabyona biidhwire buguya!”