Yobu 20 - Baibuli Ekibono kya Katonda 2014

Zofari airamu okwogera

¹ Agho Zofari Omunaamathi yairamu ng'akoba ati:

² “Olw'ebibono by'oyogeire ebintabwire, mpulira mule nga ndi n'okukwiramu amangu einho.

³ Mpuliire by'okobye ng'onenia era ng'onvuma, aye ndidhi munda mule kye ndidha okukwiramu.”

Zofari akoba ati abantu ababi bazikirira

⁴ “Bwenebwene oidhi bukalamu ng'okuva eira n'eira, bukyanga muntu ateebwa ku nsi,

⁵ eisanhu ly'omubi likoma mangu; omuntu atatya Katonda asangaalaku kaseera buseera.

⁶ Omubi asobola okukula yaawaiguka okutuuka ku igulu, ng'omutwe gwe gutuuka ku bire.

⁷ Aye alifuuyibwa empewo yaawaagho ng'oti nkungu. Abo ababaire bamubona balyebuuza ye yaaja.

⁸ Alibulagho ng'oti kirooto oba ng'oti kubonekerwa kwa mu bwire. Era taliirayo kubonekaku kabiri.

⁹ Alibulagho mu kifo ghe yabanga, abantu baaloba kwirayo kumubona.

¹⁰ Abaana be baliiriza abaavu obukombe bweyali abaibyeku.

¹¹ Amaani g'abaire ali nago mu buvubuka, aligalaamirira nago mu nkungu.

¹² Omuntu omubi awoomerwa ekibi ng'oti sukaali, yaakikwekaku ni ghansi gh'olulimi lwe.

¹³ Akisigaza mu kanwa, akole ng'akaanuuna ku.

¹⁴ Aye okudhuudhuula okwo kumala kwafuuka buka mu nda ye, obuli ng'oti busagwa.

¹⁵ Asesema obukombe bwe yaiba, Katonda yaabumutoola mu nda.

¹⁶ Ky'anuuna kiri ng'oti butwa; kimwita ng'oti n'amoodheibwa omusota ogw'obusagwa.

¹⁷ Talighangaala kubona ku birungi Katonda by'agaba, ebingi einho ng'oti maadhi agaidhwire mu mwiga.

¹⁸ Alighaayo bye yakolerera byonabyona, yaaloba kubyeyagaliramu amagoba ge yafuna mu bye yakola taligeesiimiramu,

¹⁹ olw'okuba yatuntuza abaavu yaabalekulira agho, yaanhaga endhu dh'ataazimba.

²⁰ Olw'okululunkanira ebintu kw'ali nakwo okutakoma, taliwoniagho waire ekirala ku ebyo by'agonza einho.

²¹ Ghazira ky'alya n'alekagho. N'eisanhu lye kye liriva ni limuwaaku.

²² Ekiseera ky'alibeeramu n'ebintu ebingi ebivuluudha, ebizibu kamaala birimwidhira yaadaagadaaga.

²³ Omubi aliba ng'akaali kulya kwiguta, Katonda yaamumaliraku obusungu obubitirivu, bwamufuukira emere.

²⁴ Bw'aligezaaku okulumuka olw'okwewonia okufumitibwa eky'okulwanisa eky'ekyuma ekigumu einho, alifumitibwa akasaale ak'ekyuma eky'ekikomo.

²⁵ Kalimubitamu kaafuluma, omunwa gwako ogumesunkana gwabita mu ini lye, entiisa yaamugema.

²⁶ Eby'obukombe bwe biritokomoka, omuliro ogutakumiibwa bantu gulimwokya, gwasaaniagho ni by'asigaizaagho mu ndhu.

²⁷ Eigulu liryoleka ebibi bye, n'ensi yaamulumiriza.

²⁸ Eby'omu ndhu ye birinhagibwa, era byatwalibwa ku olwo Katonda lw'alisungughala.

²⁹ Ogwo n'omugabo Katonda gw'agha omwonooni, eyo n'enkomerero y'amuteeragho.”