Yobu 2 - Baibuli Ekibono kya Katonda 2014

Sitaani aleetera Yobu okudaazibwadaazibwa kabiri

¹ Kabiri olunaku olundi, abakwenda ab'omu igulu baidha okweyandhula mu maiso ga Musengwa Katonda. Ni Sitaani yeena yaidhiramu okweyandhula mu maiso ga Musengwa Katonda.

² Agho Musengwa Katonda yaabuuza Sitaani ati: “Ova gha?” Sitaani yairamu Musengwa Katonda ati: “Nva kubitabita mu nsi, n'okugitambulatambulamu.”

³ Musengwa Katonda yaabuuza Sitaani ati: “Weekaliriisa bukalamu omugheereza wange Yobu? Omusaadha oyo azira amutuukaku kuba n'omuntu aziraku musango era omwesimbu, antya era eyeekuuma obutakola kibi. Era akaagumiire ku bwesigwa bwe, waire nga iwe wagezaaku okundhikirizisa mmuzikirize eby'obwereere.”

⁴ Agho Sitaani yairamu Musengwa Katonda ati: “Ekigema ku mubiri gw'omuntu, n'ekimulumya. Omuntu aghaayo by'ali nabyo byonabyona olw'obulamu bwe.

⁵ Aye mpegaano golola omukono gwo ogeme ku mubiri gwe, aja kukuvuma ng'obona n'okubona.”

⁶ Musengwa Katonda yaakoba Sitaani ati: “Kale, wuuyo ali mu buyinza bwo. Aye mulekere obulamu.”

⁷ Agho Sitaani yaava mu maiso ga Musengwa Katonda, yaaja, yaaleetera omubiri gwa Yobu okumwaguka amabwa amabi einho, okuva ku mutwe okutuuka ku bigere.

⁸ Yobu yaatoola akagyo ak'okweyagisanga ku mubiri, era yatyamanga mu ivu olw'okunakughala.

⁹ Agho mukazi we yaamukoba ati: “Era okaagumiire ku bwesigwa bwo? Vuma Katonda, ofe.”

¹⁰ Aye Yobu yaamukoba ati: “Oli kwogera ng'oti n'abakazi abasirusiru bwe boogera. Obwo, tunaasanhukiranga birungi byonka Katonda by'atugha, twaloba kusanhukira bitunhiga by'atugha?” Mu ebyo byonabyona ebyagwagho Yobu tiyayogera bubi ku Katonda.

Bakagwa ba Yobu baidha okumugumya

¹¹ Agho bakagwa ba Yobu basatu: Elifazi Omutemani, Bilidadi Omushuhi, ni Zofari Omunaamathi, bwe baawulira ebizibu byonabyona ebyamugwaku, bonsatuli baasalagho okuja okumugumya.

¹² Bwe baamulengera, tibaamutegeereragho. Aye bwe baamutegeera, baawowoola era baalira amaziga. Baakanula ebivaalo byaibwe olw'okunakughala, beeyugha enkungu mu mitwe, nga bwe bagimansa ghaigulu.

¹³ Era baatyama naye ku itaka okumala enaku musanvu, omusana n'obwire, nga ghazira ayogera naye kibono. Kuba baabona ng'okudaazibwadaazibwa kwe yalimu kwali kunene.