Yobu 19 - Baibuli Ekibono kya Katonda 2014

Yobu anenia bakagwa be olw'okumuvuma

¹ Agho Yobu yairamu ng'akoba ati:

² “Mulituusa gha okuneeraliikiriza n'okuunumiriza n'ebibono.

³ Mwiragainemu emikuzi kamaala nga muli ku nze mwevumira, timuswalaku kumbisa mutyo?

⁴ Ni bwe kyandibaire ekituufu nti nasobya, ensobi yange imwe yandibagemeireku gha?

⁵ Muli kuneekuluntalizaaku muti munsinga, era mwatoola enaku yange mwagifuula obukakafu nti ndi mwonooni.

⁶ Aye mugwaine mukimanhe muti Katonda n'antuusisaaku ekyo, ng'anzingiza n'olutuula okungemya.”

Yobu yeemuluguunhiza Katonda olw'okumubisa ng'omuzigu

⁷ “Bona, ndi kwasiikana nti, ‘Bandhita’, aye ghaabula ampulira; ndi kukuba enduulu aye ghazira ali kumbisa mu butuufu.

⁸ Katonda asembye engira yange, nzira bwe mbitagho; ansibiire mu nzikiiza, tikaabona ye nja.

⁹ Antoireku ebitiibwa, yantoola n'engule ku mutwe.

¹⁰ Antenteine ku ndhuyi dhoonadhoona, tikaaliku ni bwendi? Eisuubi lyange aliiyeegho ng'oti muti.

¹¹ Angemeirwa obusungu obwaka ng'oti muliro; ali kumbisa ng'oti ndi muzigu we.

¹² Amagye ge gaidhira ghalala nga gategeka okuunumba, gaabwama okuzingiza weema yange.”

Yobu akoba ati abantu be bamweyawireku

¹³ “Katonda andhawukainia ni baganda bange, n'abamanhe mbafuukiire ng'oti mugwira.

¹⁴ Aboluganda ni bakagwa bange baneetoireku.

¹⁵ Abantu be nakyazanga ewange baneerabiire, abairu bange abakazi bambisa ng'oti mugwira era ow'endha.

¹⁶ Bwe ndheta omwiru tanvugira, ni bwe mmwegayirira tanfaaku.

¹⁷ Mukazi wange aneesuula ghala olw'omuuka gwange; baganda bange tibanseetaku.

¹⁸ N'abaana abato baanhooma, bwe bambona bansekerera.

¹⁹ Bakagwa bange einho bankyaye; abo be nagonzanga einho baneegaine.

²⁰ Omubiri guneeriipye ku magumba, mponeire ghatono obutafa.

²¹ Munsaasire, munsaasire imwe bakagwa bange, kuba Katonda ankubye.

²² Ku lwaki Katonda ankiriga, n'imwe mwena ni munkiriga? Okudaazibwadaazibwa okwo kwe ntuuseeku tikubamala?”

Yobu ali n'amudhulira mu igulu

²³ “Ngoli okwemuluguunhia kwange kughandiikiibwa, ni kukubwa mu kitabo!

²⁴ Ngoli kubaadhiibwa mu lubaale n'ekyuma ekisongovu, ni baidhuza mu nukuta eisasi eisaanuuse, olwo kusomebwenga enaku dhoonadhoona.

²⁵ Aye ndidhi ng'Omununuzi wange mulamu, era n'alisalagho eky'enkomerero ku nsi.

²⁶ Ndibona Katonda nga ndi n'omubiri, waire ng'endwaire egumazeegho.

²⁷ Ndimubona nze mwene n'amaiso gange, nga n'oyo mwene, se ti wundi. Omwoyo gwange gweraliikirira

²⁸ kuba mukoba muti, ‘Ka tumukirige inho, olw'okuba ensonga kwe tusinziira eva mu mwene.’

²⁹ Aye mpegaano mutye empiima: empiima eyo ereeta ekibonerezo kya Katonda ku babi, olwo mumanhe nti eriyo okusala omusango.”