Yobu 18 - Baibuli Ekibono kya Katonda 2014

Bilidadi asirisa Yobu

¹ Agho Bilidadi Omushuhi yairamu ng'akoba ati:

² “Munaatuusa gha okunoonia eby'okwogera? Musooke mwefumintirize memale olwo twogere.

³ Ku lwaki otubalira mu nsolo? Ku lwaki otufuula abasiru?

⁴ Iwe ali kwekulubula omubiri mu busungu wulira: Olowooza oti ensi enaafuuka oti irungu ku lulwo? Oba oti ensozi dhinaasiguukululwa mu kifo kyadho olw'okukusanhusa?

Ekituuka ku boonooni

⁵ Bwenebwene obulamu bw'omubi buzimizibwa ng'oti ntaala, oba ng'oti mmuli edhimulika, edhitairayo kwaka.

⁶ Ali ng'oti n'endhu eidhamu enzikiiza, entaala emulisaamu ng'ezikiire.

⁷ Eyali atambula nga yeekakasa, mpegaano yeekengeera gh'aniina. Amagezi g'agha abandi mwene gamuswire.

⁸ Ebigere bye bimutunze, yeeswire mwene mu mutego.

⁹ Omutego gumugemye ekibbonge gwamukalangula.

¹⁰ Bamuteze omugugha mu itaka gumugemye; bagisiisa olutuula mu ngira ye.

¹¹ Ebimutiisa bimuli ku buli luuyi, bimubingirira buli gh'atoola ekigere.

¹² Endhala emuluma y'awaamu amaani, akabi kali agho kamuteegereire.

¹³ Endwaire embi emuliire omubiri, era yaamuvunza amakono n'amagulu.

¹⁴ Bamughalwiza mu ndhu ye y'abaire nga yeesiga, baamughaluudhania okumutwala ye Kyabazinga afuga okufa.

¹⁵ Omuntu aba ng'ayenze n'eyeesulira mu ndhu eyo etakaali yiye, nga bamaze okumansiramu obuganga bwa salufa.

¹⁶ Ali ng'oti muti ogukala okuviira irala ku mizi, okutuuka ghaigulu ku busanso bw'ensaga

¹⁷ Balimwerabirira irala ku nsi, ghaabulagho amwidhukira naire.

¹⁸ Balimutoola mu butangaavu baamubingira mu nzikiiza, ave mu nsi y'abalamu.

¹⁹ Ku babe tighalisigalagho mwana waire omwidhukulu. Era ye yabanga teriwonayo muntu naire omulala.

²⁰ E buvandhuba n'e bugwandhuba, abaliwulira ebimutuuseeku, baligemwa entiisa baatya inho.

²¹ Bwenebwene eyo n'enkomerero y'ababi ekyo n'ekirituuka ku abo abateefiirayo ku Katonda.”