Yobu 17 - Baibuli Ekibono kya Katonda 2014

¹ “Obulamu bwange bujiire, enaku dhange dhiwoireku; amagombe gonka ge nteegereire.

² Bwenebwene buli muntu anhooma mulala nze, era mbabona boonaboona nga bali kunsonsoonia.”

Yobu asaba Katonda amuyambe

³ “Wo Katonda, niiwe obe onteeregho akabega, ghazira wundi anampolerezaayo.

⁴ Nga bw'obaleese enzimeera ku mwoyo ni batasobola kutegeera, otabaleka kughangula.

⁵ Omuntu yeenayeena alya mu baine olukwe olw'okufuna ebintu byaibwe, abaana be balidaagadaaga.”

Yobu taganha ati bakagwa be batuufu

⁶ “Nfuuliibwa nseko dha balamu, era abantu ye bafuudhaku amatanta.

⁷ Amaiso gandidhieku ekifu olw'enaku, zeenazeena ngoogombye, nsigaire magumba.

⁸ Abantu abeeyeta abalungi bwe babona kino batya inho, era bansungughalira nga banvunaana obutatya Katonda.

⁹ Aye abo abeeyeta abatuufu, beeyongera bwa kwegumya bati batuufu.

¹⁰ Aye ngoli boonaboona baidha baayemerera mu maiso gange, tyandyagainemu mugezi waire omulala ati.”

Okufa, n'eisuubi lya Yobu ly'asigaiza lyonka

¹¹ “Enaku dhange dhijiire; bye ntegeka bifiire, era ni bye nsuubira byona bityo.

¹² Bakagwa bange obwire babweta musana, enzikiiza bw'eba erikugema, bati bunaatera okutangaala.

¹³ E magombe ni yonka ye nsuubira okuba amaka gange, neeyalire eyo obuliri, ntenduke mu nzikiiza.

¹⁴ Ndhete amagombe lata, n'enhengere ndheete maama era ndheete baanhinaze.

¹⁵ Olwo eisuubi liri gha? Kye nsuubira naani ali kukibona?

¹⁶ Ndiikirira n'eisuubi eryo e magombe? Tulija nalyo tutyo eyo mu itaka?”