Yobu 16 - Baibuli Ekibono kya Katonda 2014

Yobu yeemuluguunhiza bakagwa be olw'obutamusaasira

¹ Agho Yobu yairamu ng'akoba ati:

² “Mpuliire ebintu kamaala ebiri ng'oti n'ebyo. Kale okunsaasira kwaimwe, nnaku ndhereere.

³ Ebibono ebyo ebiri ng'oti mpewo buwewo, tibiikome? Ye kiki einho ekikusonsooniiza okundhiramu otyo?

⁴ Zeena nandisoboire okwogera nga bwe mwogeire, ngoli niimwe omuli mu mbeera nze ye ndimu. Nandiboogereire ebisongovu, nga bwe ntengeesa n'omutwe nga mbanhooma.

⁵ Nandyogeire ebibagumya na munwa bunwa gwonka, era bye nandibakobye obukobe byandibamaze okubawoleezaaku ku bulumi bwaimwe.”

Yobu yeemuluguunhiza Katonda olw'okumudaazadaaza

⁶ “Aye ni bwe ndhogera ntya, obulumi bwange tibuwoleera. Ni bwe nsiriikirira ntya, tighegheeraku naire.

⁷ Katonda wange, bwenebwene ommaze amaani, n'abantu bange boonaboona obazikiriiza.

⁸ Omaze okunsiba, oli muzigu wange. Obugoogombe bwange, abantu kwe bava okukakasa bati omusango gunsinga.

⁹ Katonda ankyaye era mu busungu bwe yandhuzayuza; omuzigu wange oyo antunguliire amaiso.

¹⁰ Abantu baaningiriire baayasaamirira. Baneebbuuseeku bankuba empi ku matama.

¹¹ Katonda ampaireyo y'ababi, yansuula mu ngalo dh'aboonooni.

¹² Nali nga ntyamiisa, aye yaidha yankontakonta yangema mu mamiro, yankuba ekigwo ghansi yaamaniangula. Yantaagho ng'ekintu eky'okwegeraku endeega,

¹³ olwo abalasa obusaale bwe baaneezungulula. Atulisa ensigo dhange n'akasaale aghazira kusaasira naire, yaafumita akaka kange, amaadhi gaamu gaayuyika ku itaka.

¹⁴ Anumba ng'oti n'omulwani ow'omu lutalo, yaamenhamenha buli buyungiro bwange.

¹⁵ Neetungiire ekutiya era naagivaala olw'okunakughala, era naagyeta ku mubiri. Mpoiremu amaani, naagalaamirira agho mu nkungu.

¹⁶ Amaiso gaamyuse olw'okulira, era ganzimbye gaidhaku ekifu.

¹⁷ Ate nga tikolangaku bukambwe, era nsinza Katonda bukalamu.”

Yobu ali n'amudhulira mu igulu

¹⁸ “Iwe ensi otalobera musaayi gwange, n'ogulobera kululuma; otaganha kulira kwange kusirisibwa.

¹⁹ Ni mu kaseera kano mu igulu eriyo andhulira; ghaigulu eyo eriyo ansemba nga ndi mutuufu.

²⁰ Bakagwa bange baanhooma, aye ye Katonda ye numukira nga ndira amaziga.

²¹ Nandyenze ghabeegho ampolerezaayo ye Katonda, ng'oti n'omuntu bw'awolerezaayo muntu mwine, eri omuntu amuvunaana omusango.

²² Kuba emyaka mitono gye nsigaiza, ntambule okuja eyo ye ntaliva kwira.”