Yobu 15 - Baibuli Ekibono kya Katonda 2014

Olughayo olwokubiri 15:1—21:34 Elifazi anenia Yobu okweyeta aziraku musango

¹ Agho Elifazi Omutemani yairamu ng'akoba ati:

² “Ow'amagezi tairamu na bibono biziramu makulu; tayogera bibono biri ng'oti mpewo buwewo.

³ Tatakana biziramu muganhulo, oba okwogera ebibono ebitavaamu kalungi koonakoona.

⁴ Otuuse okulobera abantu okutya Katonda, n'okuja mu maiso ge okumusaba.

⁵ Ebibi byo byeyolekera mu ebyo by'oyogera, era okozesa lulimi lwa buguya.

⁶ Omunwa gwo gwene n'ogukusalira omusango okukusinga, se ti ninze. By'oyogera byene n'ebikulumiriza.

⁷ Olowooza oti niiwe owasooka abantu boonaboona okuzaalibwa? Oba oti iwe wazaalibwa nga n'ensozi dhikaali kubaagho?

⁸ Katonda bweyali ng'ateesa mu igulu waliyo? Niiwe wenka omugezi?

⁹ Kiki ky'oidhi ife kye tutaidhi? Kiki ky'otegeera ife kye tutategeera?

¹⁰ Ife tuli ghano n'ab'envu era n'abakaire einho, abakulu okusinga ni lata wo.

¹¹ Katonda by'akukolera okukugumya, obitwala nga bitono inho y'oli? Tukukobeire ebibono ebikalamu ku lulwe.

¹² Ku lwaki osuuyirira otyo, n'omoga n'obukambwe otyo?

¹³ Ku lwaki osungughalira Katonda, n'oyogera ebibono ebiri bityo?

¹⁴ Omuntu obuntu asobola okuba omulongoofu? Omuntu eyazaalibwa obuzaalibwe, Katonda aghanga okumubala ati mutuufu?

¹⁵ Ate oba Katonda tiyeesiga waire bamalaika be! Era nga n'eigulu ti irongoofu mu maiso ge!

¹⁶ Memale olwo aghanga atya okwesiga omuntu omwonoonefu era atagasa, eyeededa ebyonoono ng'oti yeededa maadhi!”

Enkomerero y'omubi

¹⁷ “Yobu, ntegera kutu ndhogere nkukobere bye mboine,

¹⁸ n'ebyo abagezigezi bye bakoba nga babitoola ku badhaadha baibwe.

¹⁹ Badhaadha baibwe abo bonka n'abaagheebwa ensi eno, ng'eziramu bantu bagwira; ng'eziramu muntu asobola kubadaaliimya kuva ku Katonda.

²⁰ Omuntu omubi, oyo abisa obubi abandi, adaagadaaga obulamu bwe bwonabwona.

²¹ Awulira mu matu ge amamiro agatiisa. Lw'afunaku akalembereza lw'alumbibwa abanhazi.

²² Tasuubira kuva mu nzikiiza; ateegerera bwa kwitibwa.

²³ Atambula eyo atyo ng'anoonia k'anaalya, nga yeebuuza y'anaakaagaana. Aidhi ati olunaku olw'enzikiiza lumukyereire.

²⁴ Enaku n'okweraliikirira bimutiisa, oti ni kyabazinga ow'amaani bw'atiisa be yeetegeike okulumba.

²⁵ Kuba asonse mu Katonda olwala, yaasonsoonia Aghanga Ebintu Byonabyona.

²⁶ Omuntu omubi oyo adheemera Katonda, yaaja okumulumba n'engabo ye enkologho,

²⁷ waire ng'azira ky'aghanga, olw'okugeedhagana.

²⁸ Era aba mu bibuga ebyasengukamu abantu; ate endhu, asula mu bifulukwa ebidhuliriire okugwa.

²⁹ Obukombe bwe bulibita bubite, talimala nabwo kiseera kireeyi, ni mwene yeena talighangaala.

³⁰ Era taja kuva mu nzikiiza. Aliba ng'oti n'ensaga dh'omuti edhibabwirwa omuliro, era nga n'ebimuli byagwo bitwaliibwa empewo.

³¹ Bw'aira agho ni yeesiga ebiziramu muganhulo aba musiru, kuba byene ebyo by'alisasulwamu.

³² Alikala mangu ng'ekiseera kye kikaali; taliiramu kusibuka ng'oti lusaga.

³³ Aliba ng'oti muzabbibu ogukunkumusa ebibala byagwo ebikaali kwenga; era ng'oti muti mwoliva ogukunkumusa ekimuli.

³⁴ Kuba abatatya Katonda baidha kubanga bagumba. Era omuliro gwidha kwokyanga endhu dhe bafuna mu kukupankupania.

³⁵ Abantu abo bategeka okukola ebibi, era baabikola, baidhwire buguya bwereere.”