Yobu 14 - Baibuli Ekibono kya Katonda 2014

Yobu yeemuluguunhia ku bumpi obw'obulamu bw'omuntu

¹ “Buli muntu azaalibwa mukazi, era obulamu bwe buba bumpi ate nga bwidhwire bizibu.

² Omuntu akula yaaniala ng'oti kimuli, era yaabulagho yaaweekereragho ng'oti kinsense.

³ Kale iwe Katonda waadaaga okulingirira omuntu ali atyo, era waamuleeta mu maiso go omusalire omusango?

⁴ Naani aghanga okufuula ekintu ekitali kirongoofu, ni kiba ekirongoofu? Ghazira naire omulala ati.

⁵ Buli muntu wamusaliragho enaku dh'alighangaala, waamugerera n'emyezi era waamupimira ekiseera kye, ky'ataghanga kuswisaagho.

⁶ Kale lekera okumulingirira, omuleke awuumuleku, asobole okumalaku olunaku lwe ng'oti n'omupakasi.”

Yobu yeemuluguunhiza Katonda olw'okumumalamu eisuubi

⁷ “Bwe batema omuti, ghabaagho eisuubi ery'omuti ogwo okusibuka ni gwiragho.

⁸ Waire emizi gyagwo gikairigha mu itaka, ekikonge kyagwo ni kivunda,

⁹ bwe gutuukibwaku amaadhi, gulisibuka, gwaleeta ensaga ng'oti n'ekisimbe ekiyaaka.

¹⁰ Aye omuntu afa yaaweeramu irala; bw'agheera ogw'enkomerero aba nga takaaligho.

¹¹ Ng'enhandha bw'ekamiira, era ng'omwiga bwe gukaliira,

¹² n'omuntu atyo bw'afa, yaagalaamirira obutasituka. Taja kwira ngulu naire, oba okuzuusibwa mu ndoolo dhe ng'eigulu likaaligho.

¹³ Nguli ongisiisa e magombe n'onkuumira eyo, okutuusa obusungu bwo lwe buliwaagho. Era n'ongerera ekiseera n'omala n'ondidhukira.

¹⁴ Omuntu bw'afa amala yairamu obulamu? Aye nze nandiguminkiriiza mu bizibu bino, okutuusa lwe nandirekwirwa.

¹⁵ Olwo wandindhese naavugira wansangaalira nze ye wakola n'engalo dho.

¹⁶ Olwo wandabirira buli kigere kye nsitula, aye waaloba kwekalirisa bibi byange.

¹⁷ Olwo wansonigha ebibi byange ebyo, waabitoolagho; waasasaagho ebisobyo byange ebyo.

¹⁸ Aye ensozi dhigwa dhaamulunguka, n'olubaale lwasiguukululwa mu kifo kya lwo.

¹⁹ Era amaadhi gaseenenia amabaale, ni mukoka yaatwala eitaka. Weena otyo bw'ozikiriza eisuubi omuntu ly'aba nalyo.

²⁰ Oidha waamusinza amaani, waamumaliragho irala, era waamufaanania bundi mu maiso ng'afiire.

²¹ Batabane be bwe batuuka ku kitiibwa, ebyo tabimanha; ni bwe batoolebwa ku kitiibwa, ebyo tabibona.

²² Awulira bulumi obumuliku mwene bwonka, era awulira na nnaku emugemaku mwene yenka.”