Yobu 12 - Baibuli Ekibono kya Katonda 2014

Yobu akoba ati yeena mugezi oti ni bakagwa be

¹ Agho Yobu yairamu ng'akoba ati:

² “Bwenebwene niimwe amamiro ag'abantu, era bwe mulifa, abagezi baliwaagho.

³ Aye zeena ntegeera ng'oti niimwe; timunsinga naire. Naani ataidhi ebyo byonabyona bye mwogeire?

⁴ Nsekererwa bakagwa bange, nze eyasabanga Katonda n'andhiramu. Nze omuntu akola ekituufu, aziraku musango, mpegaano nsekererwa bantu.

⁵ Omuntu azira nnaku asekerera ole adaaga. Omuntu adaagadaaga era n'aidhirwa ebizibu.

⁶ Amaka ag'abanhazi gaba bukalamu, n'abo abasungughaza Katonda bazira kibatiisa; amaani gaibwe n'agafuuka katonda waibwe ye beesiga.”

Ensolo dhisobola okukukobera ebifa ku Katonda

⁷ “Aye buuza ensolo, dhiidha kukwegeresa; n'enhonhi dhiidha kukukobera.

⁸ Oba buuza ebitonde eby'oku nsi, n'eby'omu nhandha, biidha kukwinhonhola.

⁹ Mu bitonde ebyo byonabyona, kiri gha ekitaidhi, nti ebibaagho byonabyona bikolebwa Musengwa Katonda?

¹⁰ Buli kintu ekiramu kiri mu mikono gye; obulamu bw'abantu bwona n'abufuga.

¹¹ Omuntu mu by'awulira, kutu we tayawulagho bituufu na bitali bituufu, ng'oti n'olulimi lwe bwelwawulagho emere ewooma n'etawooma?

¹² Amagezi gaba na bakaire, n'okutegeera kwajiira ku nnaku edh'obulamu bw'omuntu.”

Katonda ali n'obuyinza okukola nga bw'ayenda

¹³ Katonda ali n'amagezi n'obuyinza; ali n'okutetenkania n'okutegeera.

¹⁴ Katonda ekintu ky'amenhie ghazira asobola kukizimba buyaaka; Katonda omuntu y'asibiire mu ikomera ghazira asobola kumusibula.

¹⁵ Bw'alobera amaadhi okugwa, ghabaagho endoboozi; bw'agaleka ni gagwa, omwidhuzo gughemba ensi.

¹⁶ Katonda wa maani era mughanguzi, ole ye baguya n'ole aguya, bombi bali mu buyinza bwe.

¹⁷ Abafuzi b'ensi abamalamu amagezi, abalamuzi yaabafuula abasirusiru.

¹⁸ Avaalulula bakyabazinga ebivaalo eby'ekitiisa yaabafuula abairu, yaabasiba ebikerebetu.

¹⁹ Bakabona abamalamu amagezi, abafuzi ab'amaani yaabatoola mu buyinza.

²⁰ Asirisa abo, abantu boonaboona be beesiga, n'abakaire yaabatoolaku okutegeera.

²¹ “Aleetera abakungu okunhoomebwa, ab'obukumu yaabamala amaani.

²² Ayoleka ebigise ebitaboneka, yaamulisa ebiri mu nzikiiza egemye bedimudimu.

²³ Akulankulania amaghanga, ate yaamala yaagazikiriza; agafuula ag'amaani, ate yaamala yaagasaaniagho.

²⁴ Abafuzi b'abantu abafuula basiru, yaabaleetera okuyengeetera eyo mu irungu ezira ngira.

²⁵ Baghaamanta mu nzikiiza eri bedimudimu, yaabaleetera okutagala ng'oti batamiivu.”