Yobu 11 - Baibuli Ekibono kya Katonda 2014

Zofari akoba Yobu ati Katonda tamubonereiza kimala

¹ Agho Zofari Omunaamathi, yaakoba ati:

² Obwo, omuntu ayogera ebibono kamaala bityo, tasaine kwiribwamu? Okwogera ebingi kitegeeza kusinga musango?

³ Obwo, Yobu olowooza oti okwesuutiriza kwo kunaasirisa abantu abandi? Bw'okiina abantu, obwo tighaabe akukobaku?

⁴ Kuba okoba oti by'oikiriza n'ebituufu; era oti Katonda abona ng'oziraku musango.

⁵ Aye ha, nguli Katonda ayogera n'iwe maiso ku maiso.

⁶ Yandikukobeire eby'amagezi ebigisiibwa, ebitaghanga kumanhika ni biwaayo. Kale ni manha nti Katonda ali kukubonereza katono okusinga bw'ogwaine.

Amagezi ga Katonda gaswikiriire omuntu

⁷ Osobola okwagaaza ebifa ku Katonda Aghanga Ebintu Byonabyona, waabizuula waabimalayo?

⁸ Bigulumivu okusinga eigulu. Oghanga kukola ki? Biika ghansi okusinga e magombe. Oghanga kubimanha otya?

⁹ Bw'obipima bisinga ensi obunene, n'enhandha bigisinga obugazi.

¹⁰ Katonda bw'aidha n'asiba abantu mu ikomera, n'abeeta okubasalira omusango, naani asobola okumulobera?

¹¹ Kuba aidhi abantu abazira kye bagasa. Abona ebibi bye bakola, yaabita ku mwoyo.

¹² Tikiribaagho bantu basiru kutegeera, ng'oti bwekitalibaagho endogoyi edh'omu nsiko okuzaala endogoyi enfuge.

Zofari akoba Yobu ati bweyeenenia Katonda amukuuma

¹³ “Yobu, bw'oneenenia mu mwoyo gwo, oidha kusobola okugololera emikono gyo ye Katonda omusabe.

¹⁴ Bw'oba ng'oli n'ebikyamu by'okola kanga agho, olobe kuganha bibi kubanga mu maka go.

¹⁵ Olwo oidha kuba nga tokeebwalabwala, era oidha kuba ng'oli mugumu, nga ghazira ky'otya.

¹⁶ Oidha kwerabira enaku yo, ng'oti ni bwe weerabira amaadhi agakuulwire ni gaja.

¹⁷ Obulamu bwo bwidha kwakayakana okusinga obutangaavu obw'omu kasana ghagati. Ebizibu eby'omu bulamu bwo biidha kukyuka ng'oti n'enzikiiza bw'efuuka obutangaavu ku nkyo.

¹⁸ Oidha kubanga n'emiraala olw'okuba n'eisuubi. Katonda aidha kukukuumanga owuumule ng'ozira ky'otya.

¹⁹ Oidha kutendukanga nga ghazira akutiisa; abantu kamaala baidha kukusabanga obuyambi.

²⁰ Aye ababi baidha kumagamaganga, babulwe obulumukiro. Eisuubi lyaibwe liri mu kufa.”