Yobu 10 - Baibuli Ekibono kya Katonda 2014

Yobu akoba ati Katonda abisa bubi ebitonde bye

¹ “Neesiniirwa obulamu, ndidha kwemuluguunhia abantu bawulire, ndidha kwatula enaku endi ku mwoyo.

² Ndidha kukoba Katonda nti otansalira bwa musango kunsinga, aye mmanhisa ky'onvunaana.

³ Kirungi ki ky'ofuna mu kukayukira n'okunhooma ebintu mwene bye wakola n'engalo dho, ate n'osanhukira entegeka edh'ababi?

⁴ Iwe ebintu obibona ng'omuntu bw'abibona? Oba obitegeera ng'omuntu bw'abitegeera?

⁵ Enaku dh'oghangaala dhaaga n'edh'abantu abafa? Oba emyaka gy'oghangaala gyaga n'egy'abantu?

⁶ Ku lwaki oyenda okubuuliriza ku bibi byange, n'okunoonereza ku kwonoona kwange?

⁷ Ate nga oidhi nga nze nziraku musango, era nga ghazira asobola kumponia n'antoola mu ngalo dho.”

Yobu akoba ati Katonda ayenda kumusaaniagho

⁸ “Niiwe mwene owampumba n'engalo dho. Aye mpegaano oneefuuliire okunsaaniagho.

⁹ Idhukira nga wampumba mu itosi. Onandhizaayo wanfuula enkungu kabiri?

¹⁰ Ti niiwe owanfuka ng'oti mata mu nda ya maama, n'ompumba ng'oti kitole kya muzigo?

¹¹ Wayunga amagumba gange n'emiziisa, waagaghembaku emamba n'omubiri.

¹² Wampa obulamu wangonza obutalekera, era wakuuma bukalamu obulamu bwange.

¹³ Aye ghaligho bino bye wagisa nga bya kyama. Ndidhi nga wabitegeka bintuukeku.

¹⁴ Waneekalirisanga obone oba nga nkola ekibi, olwo olobe okukinsonigha.

¹⁵ Bwe nkola ekibi, olwo mba nga nkagwireku! Ni bwe nkola ekituufu nsigala nga neewumbye naidhula ensoni, era naawaamu olw'okudaazibwadaazibwa.

¹⁶ Bwe nkola ekintu ekindeetera okwenhumiriza, oba ng'oti mpologoma wandhiiga; waakola ebyewuunhisa okuunumya.

¹⁷ Onumba buyaaka okundaazadaaza weeyongera okunsungughalira era wansindikira ebizibu kamaala, ebiri ng'oti n'ebikunsu kamaala eby'abalwani ab'amaani.”

Yobu asaba Katonda amuleke kuba anaatera okufa

¹⁸ “Kale ku lwaki waleka ni nzaalibwa? Kasinga nandifiire nga ghazira naire muntu amboineku.

¹⁹ Olwandiviire mu nda nti, nga banziikiragho, naaba ng'atabangaghooku.

²⁰ Obulamu bwange tibusigaizaayo bwa nnaku ntono dhiti? Kale ni ndeka nsangaaleku akatono,

²¹ nga nkaali kuja mu nsi eyo ey'ekinsense n'enzikiiza etiisa einho, ye ntaja kuva naire;

²² ensi egemye enzikiiza bedimudimu, eidhwire okutabukatabuka, era obutangaavu ye buli ng'oti nzikiiza.”