Yobu 1 - Baibuli Ekibono kya Katonda 2014

Ebigema ku Yobu

¹ Ghaaligho omusaadha mu nsi eyetebwa Uzi, ng'ayetebwa Yobu. Omusaadha oyo yali muntu aziraku musango era omwesimbu, ng'atya Katonda era nga yeekuuma obutakola kibi.

² Yali n'abaana abalenzi musanvu, n'abaana abaghala basatu.

³ Yali n'entaama kasanvu (7,000), engamiya enkumi isatu (3,000), ente edhirima lukumi (1,000), endogoyi enkazi ebikumi bitaanu (500), era n'abairu kamaala inho. Omusaadha oyo n'eyali asinga okuba omukombe mu bantu ab'e buvandhuba boonaboona.

⁴ Batabane be baafumbanga embaga mu mpalo, buli mulala mu ndhu ye, baayeta baanhinaibwe abasatu, baidha okulya n'okunhwa nabo.

⁵ Enaku edh'embaga dhaibwe bwe dhaawangaku, Yobu yaabeetanga okubatukuza. Yaawuunanga mu nkyo, yaagheerayo buli muntu ekigheebwayo ekyokebwa. Kuba Yobu yakobanga mule ati: “Tomanha baana bange bwe baba nga baliku ekibi kye bakoze, ni bavuma Katonda mu myoyo gyaibwe.” Atyo Yobu bwe yakolanga buliidho.

Sitaani asaba Katonda amuganhe okuleba Yobu

⁶ Olunaku lwali lulala, abakwenda ab'omu igulu baidha okweyandhula mu maiso ga Musengwa Katonda. Ni Sitaani yeena yaidhiramu.

⁷ Musengwa Katonda yaabuuza Sitaani ati: “Ova gha?” Sitaani yairamu Musengwa Katonda ati: “Nva kubitabita mu nsi, n'okugitambulatambulamu.”

⁸ Musengwa Katonda yaabuuza Sitaani ati: “Weekaliriisa bukalamu omugheereza wange Yobu? Omusaadha oyo azira amutuukaku kuba n'omuntu aziraku musango era omwesimbu, antya era eyeekuuma obutakola kibi.”

⁹ Agho Sitaani yairamu Musengwa Katonda ati: “Olowooza Yobu akutiira bwereere?

¹⁰ Wamukolera olukomera okumwezunguluza mwene n'amaka ge, n'ebibye byonabyona by'ali nabyo. By'akola byonabyona obigha enkabi, n'obukombe bwe, bweyongeire obungi mu nsi.

¹¹ Aye mpegaano golola omukono gwo omutooleku byonabyona by'ali nabyo, aja ku kuvuma ng'obona n'okubona.”

¹² Musengwa Katonda yaakoba Sitaani ati: “Kale, byonabyona by'ali nabyo biri mu buyinza bwo. Aye mwene otamukolaku kabi.” Agho Sitaani yaava mu maiso ga Musengwa Katonda.

Yobu afiirwa abaana be n'ebintu bye

¹³ Lwali lulala, batabane ba Yobu ni baghala be bwe baali nga bali kulya era nga bali kunhwa omwenge ogw'emizabbibu mu ndhu ya muganda waibwe omukulu,

¹⁴ omukwenda yaidha eri Yobu yaakoba ati: “Ente dhibaire dhiri kulima, n'endogoyi nga dhidhiriinaine agho dhiri kulya,

¹⁵ abanhazi Abasabea baadhigwaku, baadhinhaga. Baita abagheereza bo boonaboona; era nze zenka ninze mponiegho okwidha okukukobera.”

¹⁶ Oyo yali akaayogera, owundi yaidha yaakoba ati: “Omuliro gwa Katonda gugwire nga guva mu igulu, gwazikiriza entaama n'abaayi ababaire nga bali kudhaaya; era nze zenka ninze mponiegho okwidha okukukobera.”

¹⁷ Oyo yali akaayogera, owundi yaidha yaakoba ati: “Abanhazi Abakaladea, nga beegabyemu ebikunsu bisatu, baidhie baagwa ku ngamiya, baadhinhaga. Baita abagheereza bo boonaboona; era nze zenka ninze mponiegho okwidha okukukobera.”

¹⁸ Oyo yali akaayogera, owundi yaidha yaakoba ati: “Batabane bo ni baghala bo babaire bali kulya era nga bali kunhwa omwenge ogw'emizabbibu mu ndhu ya muganda waibwe omukulu,

¹⁹ kiwunga ow'amaani yaava mu irungu yaakuba ensonda eina edh'endhu, endhu yaabagwaku era bafiire; era nze zenka ninze mponiegho okwidha okukukobera.”

²⁰ Agho Yobu yaasituka, yaakanulamu ekivaalo kye era yaamwa omutwe gwe olw'okunakughala, yaakutama n'ekyeni kyatuuka ku itaka, yaasinza Katonda.

²¹ Yaakoba ati: “Mu nda ya maama navaamu nga ndi bwereere, era ndifa nga ndi bwereere. Musengwa Katonda n'eyampa ebyo, era Musengwa Katonda oyo n'atoiregho kale asaakibwe.”

²² Mu ebyo byonabyona ebyagwagho, Yobu tiyayonoona, waire okunenia Katonda.