Yoanne 9 - Baibuli Ekibono kya Katonda 2014

Yesu awonia omusaadha eyazaalibwa nga mutulu

¹ Yesu bwe yali atambula yaabona omusaadha eyazaalibwa nga mutulu.

² Abeegeresebwa be baamubuuza bati: “Mwegeresa, omusaadha ono okuzaalibwa nga mutulu naani eyayona? Mwene oba bazaire be?”

³ Yesu yaabairamu ati: “Mwene ti n'eyayona waire abazaire be, aye yatuluwala amaani ga Katonda gamweyolekeremu.

⁴ Tuteekwa okukola eby'oyo eyantuma nga bukaali musana, kuba obwire buli kwidha nga ghazira aghanga kukola.

⁵ Nga ndi mu nsi muno, ninze ekimuliikirira eky'ensi.”

⁶ Bwe yamala okwogera ebyo yaafuudha ku itaka, yaakola ekisoodo mu matanta n'enkungu yaakibbaaka ku maiso g'omusaadha.

⁷ Yaamukoba ati: “Ja onaabe mu maiso mu kidiba ky'e Siloamu.” (Eriina eryo litegeeza, “atumiibwa?”) Kale yaaja, yaanaaba, yaira ng'abona.

⁸ Ab'oku lulaalo lw'ewaibwe n'abantu abandi abaamubonanga ng'asabiriza, beebuuzagania bati: “Ono ti n'omusaadha eyatyamanga ghale ng'asabiriza?”

⁹ Abandi baakoba bati: “N'oyo.” Ate abandi baakoba bati: “Busa, ti n'oyo, kumufaanana bufaanane.” Agho omusaadha mwene yaakoba ati: “Ninze.”

¹⁰ Kyebaava ni bamubuuza bati: “Kiidha kitya okuba nga buti oghanga okubona?”

¹¹ Yaabairamu ati: “Omusaadha ayetebwa Yesu akoze agho ekisoodo yaakimbaaka ku maiso, era yankoba nje nnaabe mu Siloamu. Kale naaja, naanaaba era naatoolera okubona.”

¹² Baamubuuza bati: “Oyo ali luuyi gha?” Yairamu ati: “Tiidhi.”

Eyali omutulu airamu ebibuuzo by'Abafarisaayo

¹³ Agho baaleeta ole eyali omutulu eri Abafarisaayo.

¹⁴ Olunaku Yesu lwe yakola ekisoodo n'azibula omutulu amaiso lwali lwa Sabbato.

¹⁵ Kale Abafarisaayo boona baabuuza omusaadha ensambo ye yazibukamu amaiso. Yaabakoba ati: “Yambbaaka ekisoodo ku maiso, naanaabamu, era mbona.”

¹⁶ Abafarisaayo abandi baakoba bati: “Omusaadha oyo ti wa Katonda, kuba tagondera mateeka ga Sabbato.” Aye abandi baakoba bati: “Omuntu omukozi ow'ebibi aghanga atya okukola ebyewuunhio oti ni bino?”

¹⁷ Agho kabiri baabuuza omusaadha eyali omutulu bati: “Oyo omwogeraku ki, nga bwe yakuzibwire amaiso?” Yaakoba ati: “Mulanzi.”

¹⁸ Aye Abayudaaya baali tibali kwikiriza ng'omusaadha oyo yali mutulu aye buti yaaba ng'abona, okutuusa bwe baayetesa abazaire be.

¹⁹ Baababuuza bati: “Ono mutabane waimwe ye muli kukoba muti yazaalibwa nga mutulu, kiidha kitya kiti mperaano abona?”

²⁰ Abazaire be bairamu bati: “Twidhi ng'ono mutabane waife era nga yazaalibwa nga mutulu.

²¹ Aye kye tutaidhi n'okuba nga mperaano abona, era titwidhi eyamuzibwire maiso. Aye mumubuuze mwene, ti mwana muto aghanga mwene okweyogerera.”

²² Baayogera batyo lwa kutya Abayudaaya, kuba Abayudaaya baali bamaze okusalagho bati omuntu yeenayeena ayatula ati Yesu ni Kurisito wa kubingibwa mu sinagoga.

²³ Kyebaava ni bakoba bati: “Mumubuuze mwene, ti mwana muto.”

²⁴ Kabiri baayeta omusaadha eyabanga omutulu baamukoba bati: “Mu ga Katonda yogera ekituufu twidhi ng'omusaadha oyo mukozi wa bibi!”

²⁵ Omusaadha yaabairamu ati: “Oba mukozi wa bibi nze tiidhi. Ekintu kirala kye ndidhi, nti nali mutulu aye mperaano mbona.”

²⁶ Baamubuuza bati: “Kiki kye yakukolaku? Yakuzibula atya amaiso?”

²⁷ Yaabairamu ati: “Mbakobeire nga timwenda kuwulira, mperaano lwaki kabiri mwenda okukiwulira, mwenda mwena kufuuka beegeresebwa be?”

²⁸ Baamuvuma, baamukoba bati: “Niiwe omwegeresebwa w'oyo omusaadha aye ife tuli beegeresebwa ba Musa.

²⁹ Twidhi nga Katonda yayogera ni Musa aye oyo omusaadha titwidhi y'ava.”

³⁰ Omusaadha yaabakoba ati: “E! Kino kinene! Timwidhi y'ava ate nga yanzibwire amaiso!

³¹ Twidhi tuti Katonda tawulira bakozi ba bibi, aye awulira oyo amutaamu ekinhagansi era akola by'ayenda.

³² Okuviira irala ku kwinhama okw'ensi tikiwulirwangaku nga ghaligho eyazibula amaiso ag'omuntu eyazaalibwa nga mutulu.

³³ Nguli omusaadha ono ti wa Katonda, ghazira kye yandighanze kukola.”

³⁴ Agho baamukoba bati: “Wazaalirwa mu bibi era mw'okuliire, obwo weena waatwegeresa?” Baamubingira ku luya.

Obutulu bw'amaiso ag'omwoyo

³⁵ Yesu yaawulira nga bamubinze. Bwe yamubona yaamukoba ati: “Oikiriza Omwana ow'Omuntu?”

³⁶ Omusaadha yaamukoba ati: “Musengwa, naani mmwikirize.”

³⁷ Yesu yaamukoba ati: “Omuboine era n'ali kwogera n'iwe.”

³⁸ Omusaadha yaakoba ati: “Musengwa, ndhikiriza.” Yaasinza Yesu.

³⁹ Era Yesu yaakoba ati: “Ekyandeeta mu nsi n'okusala omusango, abatulu babone ate ababona bafuuke batulu.”

⁴⁰ Abandi ku Bafarisaayo abaali agho naye, bwe baawulira ekyo baamukoba bati: “Otakoba oti ife tuli batulu?”

⁴¹ Yesu yaabairamu ati: “Nguli mwali batulu timwandibaire na kibi kyaimwe aye nga bwe mukoba muti mubona, ekibi kyaimwe kibasigalaku.